Ադրբեջանը փորձում է արդարացնել իր ռազմական ագրեսիան․ Խանդանյան
«Քաղաքացիական պայմանագիր» խմբակցության պատգամավոր Սարգիս Խանդանյանը նշել է, որ վերջին յոթ տարիներին Հայաստանի և Ադրբեջանի բանակցությունները եղել են բաց և հրապարակային։
Խանդանյանի խոսքով՝ նախկինում նույնպես բանակցություններ են անցկացվել, որոնք զգալի արդյունքներ չեն տվել։
«Ես չէի ցանկանա մեկնաբանել Ադրբեջանի ԱԳ նախարարի ասածները՝ հաշվի առնելով, որ բանակցությունները բոլորին հայտնի են։ 2018 թվականին էլ Հայաստանը նշել էր, որ բանակցություններին պետք է մասնակցի նաև Լեռնային Ղարաբաղը»,– ասել է նա։
Անդրադառնալով Ադրբեջանի ԱԳ նախարար Ջեյհուն Բայրամովի հայտարարություններին՝ թե Հայաստանի «սադրիչ գործողություններն» են եղել լայնամասշտաբ գործողությունների պատճառը, պատգամավորը նշել է․
«Համաձայն չեմ, քանի որ Հայաստանը փորձում էր գտնել խաղաղ լուծումներ, բայց ակնհայտ էր, որ Ադրբեջանը պատրաստվում էր պատերազմի։ Պատերազմի պատրաստվող երկիրը հիմա տարբեր փաստարկներով փորձում է արդարացնել իր ռազմական ագրեսիան»,- ասել է «Քաղաքացիական պայմանագիր» խմբակցության պատգամավոր Սարգիս Խանդանյանը։
