«Թշնամիները կուտակվում են, սպառնալիքները մեծանում են». ԱՄՆ պաշտպանության նախարար

ԱՄՆ պաշտպանության նախարար Փիթ Հեգսեթը հայտարարել է, որ միջազգային անվտանգային իրավիճակը հիշեցնում է 1939 կամ 1981 թվականները՝ ընդգծելով աճող վտանգներն ու սպառնալիքները։

Հեգսեթը, հանդես գալով հրապարակային ելույթով, նշել է, որ ներկայում աշխարհում նկատվում է լարվածության աճ և հակամարտությունների կուտակում, ինչը կարող է հանգեցնել լայնածավալ ճգնաժամերի։ «Թշնամիները կուտակվում են, սպառնալիքները մեծանում են։ Դուք զգո՞ւմ եք դա։ Ես զգում եմ»,– ասել է նա։

Նախարարը հավելել է, որ եթե Միացյալ Նահանգները ցանկանում է խուսափել պատերազմից, ապա պետք է սկսել պատրաստվել հենց հիմա։ Նրա խոսքով՝ խաղաղությունը պահպանելու լավագույն միջոցը ուժեղ պաշտպանական և դիվանագիտական պատրաստվածությունն է։

Հիշեցնենք, որ 1939 թվականին սկսվել էր Երկրորդ համաշխարհային պատերազմը, իսկ 1981-ին Սառը պատերազմի սրացման փուլում Լեհաստանում հայտարարվել էր ռազմական դրություն, ինչը ուղեկցվել էր բողոք ակցիաներով և զանգվածային ձերբակալություններով։