Tesla-ի բաժնետերերը քվեարկում են Մասկի $1 տրլն փաթեթի շուրջ

Tesla-ի բաժնետերերը որոշում են կայացնելու այն մասին, թե արդյոք հաստատել գործադիր տնօրեն Իլոն Մասկի համար նախատեսված փոխհատուցման փաթեթը, որի արժեքը հասնում է 1 տրիլիոն դոլարի։ Սա կդառնա ամենամեծ կորպորատիվ վարձատրությունը պատմության մեջ։

Մասկը նախազգուշացրել է, որ կարող է լքել ընկերությունը, եթե առաջարկը չստանա բավարար աջակցություն։ Նրա խոսքով՝ լրացուցիչ բաժնետոմսերի փաթեթը անհրաժեշտ է, որպեսզի իր վերահսկողությունը Tesla-ում բարձրանա ներկայիս 16 տոկոսից մինչև 25 տոկոս՝ ընկերությունը պաշտպանելու համար ներդրող ակտիվիստների ազդեցությունից։

Քվեարկության ելքը մեծապես կախված է խոշոր ներդրողներից՝ Vanguard (7,5%), BlackRock (4%) և State Street (3,4%) ընկերություններից։ Նորվեգիայի պետական ներդրումային ֆոնդը, որը ունի 1,1% բաժնետոմսեր, արդեն հայտնել է իր ընդդիմությունը՝ նշելով, որ պարգևատրությունը չափազանց մեծ է և կախված է մեկ անձից։

Նոր ծրագրով Մասկը չի ստանա ո՛չ աշխատավարձ, ո՛չ էլ բոնուս։ Նրա ամբողջ վարձատրությունը կապված է Tesla-ի շուկայական արժեքի աճի՝ մինչև 8,5 տրիլիոն դոլար, տարեկան շահույթի՝ մինչև 400 միլիարդ դոլարի բարձրացման և ռոբոտների ու ինքնավար վարումի ծառայությունների վաճառքի հաջողության հետ։ Բոլոր բաժնետոմսերը ստանալու համար Մասկը պարտավորվում է դրանք պահել առնվազն յոթուկես տարի։