Ուկրաինան ԱԳՆ կկանչի Հունգարիայի դեսպանին` վարչապետի սկանդալային շարֆի համար

 Ուկրաինայի արտաքին գործերի նախարարությունը հրավիրելու է Կիևում Հունգարիայի դեսպանին և պաշտոնապես բողոք է հայտնելու վարչապետ Վիկտոր Օրբանի վզին գցած շարֆի համար, որին պատկերված քարտեզում ներառված է եղել Ուկրաինայի տարածքի մի մասը: Ուկրաինայի պարբերականները հրապարակել են ֆուտբոլիստների հետ Օրբանի լուսանկարը: Նրա շարֆին պատկերված էր Հունգարիայի քարտեզը, որին կցվել են հատվածներ Ավստրիայի, Սլովակիայի, Ռումինիայի, Խորվաթիայի, Սերբիայի և Ուկրաինայի տարածքներից:

«Ուկրաինսկայա պրավդա» թերթը գրել է, թե այդ քարտեզում պատկերված է հունգարացի ազգայնականների երազած «Մեծ Հունգարիան»:

Օրբանն այդ շարֆով ներկա է եղել Բուդապեշտում Ֆերենց Պուշկաշի անվան մարզադաշտում Հունգարիայի և Հունաստանի ֆուտբոլի հավաքականների ընկերական հանդիպմանը, որն ավարտվել է 21-1 հաշվով հօգուտ տան տերերի:

Ուկրաինայի արտաքին գործերի նախարարության խոսնակ Օլեգ Նիկոլենկոն Ֆեյսբուքում գրել է, թե Ուկրաինան ներողություն է պահանջում և հավաստիացում առ այն, որ Հունգարիան Ուկրաինայի նկատմամբ տարածքային ոտնձգություն չունի:

Վիկտոր Օրբանն անուղղակի է արձագանքել ուկրաինացիների պահանջին` Ֆեյսբուքում գրելով, թե «ֆուտբոլը քաղաքականություն չէ, մի փորձեք տեսնել գոյություն չունեցող բաներ, Հունգարիայի ազգային հավաքականը պատկանում է բոլոր հունգարացիներին, անկախ այն բանից, թե որ երկրում են նրանք ապրում»։ Վերը նշված երկրներում կան հունգարական մեծ համայնքներ:

Հունգարիան մի քանի առիթներով հայտարարել է, թե Ուկրաինայում ոտնահարում են ծագումով հունգարացիների իրավունքները և, մասնավորապես, մայրենիով խոսելու ու կրթություն ստանալու իրավունքը:

Այդ քննադատությունը հատկապես սրվել է այն բանից հետո, երբ Ուկրաինան 2017 թվականին ընդունել է օրենք, որով դպրոցներում սահմանափակվել է ազգային փոքրամասնությունների լեզուների կիրառումը: