Ինչու են կրկին անփոփոխ թողել վերաֆինանսավորման տոկոսադրույքը․ ԿԲ նախագահը պարզաբանեց

Այսօր լրագրողների հետ հանդիպմանն ՀՀ կենտրոնական բանկի նախագահ Մարտին Գալստյանը, պարզաբանեց, թե ինչու է կենտրոնական բանկը կրկին անփոփոխ է թողել վերաֆինանսավորման տոկոսադրույքը՝ 6.75 տոկոս։

Գալստյանի խոսքով` մակրոտնտեսական ընթացիկ զարգացումների պայմաններում ՀՀ ֆինանսական շուկայի մասնակիցներն ընդհանուր առմամբ ակնկալում են, որ ԿԲ-ն միջնաժամկետ հորիզոնում աստիճանաբար կնվազեցնի վերաֆինանսավորման տոկոսադրույքը` մինչև 6.25-6.5 տոկոս։

«ԿԲ-ն, քննարկելով հարկաբյուջետային քաղաքականությունների ազդեցության հետ կապված համաշխարհային չեզոք տոկոսադրույքների հնարավոր աճը, խոսքը ԱՄՆ-ի մասին է, ինչպես նաև ներքին տնտեսությունում ավելցուկային պահանջարկի պայմանների ձևավորման ռիսկերը, որոնք պահանջում են շուկայական սպասումների համեմատությամբ վերաֆինանսավորման ավելի բարձր տոկոսադրույքի ուղի, որոշեց անփոփոխ թողնել տոկոսադրույքը»,- ասաց նա։

ԿԲ նախագահը հայտնեց նաև, որ իրենց կողմից տրամադրվող լոմբարդային ռեպոյի տոկոսադրույքը 8.25 % է, իսկ բանկերից ներգրավվող միջոցների տոկոսադրույքը՝ 5.25 %:

Ներկայացնելով ՀՀ ԿԲ դրամավարկային քաղաքականության թափանցիկության զեկույցը` Գալստյանը նշեց, որ 2025 թ. 3-րդ եռամսյակում 12-ամյսա գնաճը փոքր-ինչ արագացել է` սեպտեմբերին կազմելով 3.7 տոկոս։

«2025 թ. 3-րդ եռամսյակում ՀՀ տնտեսական ակտիվությունն ավելացել է, որին շարունակել է զգալիորեն նպաստել շինարարության և ծառայությունների ճյուղերի բարձր աճը, ինչպես նաև որոշ կարճաժամկետ ոչ կառուցվածքային գործոնների ազդեցությունը։ Արձանագրվել է նաև տեղական ապրանքների և ծառայությունների նկատմամբ արտաքին պահանջարկի աճ»,- նշեց Գալստյանը։

Նա նաև վստահեցրեց, որ ԿԲ խորհուրդը կշարունակի մշտադիտարկել տնտեսության զարգացման սցենարները և պատրաստ է համարժեք գործողություններ ձեռնարկել միջնաժամկետ հորիզոնում գնաճը 3 տոկոսանոց նպատակային ցուցանիշի վրա կայունացնելու համար։

Նշենք, որ վերաֆինանսավորման տոկոսադրույքը նաև ԿԲ-ի հիմնական գործիքն է ֆինանսական շուկայի և տնտեսության կարգավորման գործում։ Այդ տոկոսադրույքի բարձրացման կամ նվազեցման միջոցով ԿԲ-ն ազդում է նաև գնաճի վրա։