ԵՄ-ն հաստատել է Ռուսաստանի դեմ 21-րդ պատժամիջոցների նոր փաթեթը

Եվրամիության անդամ երկրների դեսպանները համաձայնեցրել են Ռուսաստանի դեմ 21-րդ պատժամիջոցների կրճատված փաթեթը։ Այս մասին հայտնում է ՏԱՍՍ-ը՝ հղում անելով եվրոպական դիվանագիտական աղբյուրին։

Աղբյուրի փոխանցմամբ՝ նոր փաթեթից հանվել է ռուսական հեղուկացված բնական գազի (ՀԲԳ) ծովային փոխադրումների արգելքի մասին դրույթը։ Այդպիսով, Հունաստանը, որը ԵՄ-ում ռուսական ՀԲԳ-ի ծովային փոխադրումների գլխավոր օպերատորն է, կկարողանա շարունակել այդ վառելիքի մատակարարումը երրորդ երկրներ։

Ավելի վաղ Financial Times-ը հայտնել էր, որ հունական Dynagas նավատորմային ընկերությունը, ամենայն հավանականությամբ, թույլտվություն կստանա շարունակելու ռուսական ՀԲԳ-ի փոխադրումները։

Bloomberg-ն էլ ավելի վաղ գրել էր, որ ԵՄ-ում քննարկվում էին առնվազն երեք տարբերակ՝ հաղթահարելու նոր պատժամիջոցների փաթեթի շուրջ ստեղծված փակուղին, քանի որ վերջին շաբաթներին դրա ընդունումը կանգ էր առել։

Հաղորդվում է նաև, որ ԵՄ վեց անդամ պետություններ դեմ էին նոր սահմանափակումների մի մասին։ Մասնավորապես, դրանցից մի քանիսը հանդես էին գալիս ռուսական հեղուկացված բնական գազի ծովային փոխադրումների նկատմամբ սահմանափակումներ չկիրառելու օգտին։

Աղբյուրի տեղեկություններով՝ մինչև օրվա ավարտը 21-րդ պատժամիջոցների փաթեթը պետք է վերջնականապես հաստատվի Եվրամիության խորհրդի կողմից