ԵՊՀ-ից հեռացված դասախոսը բուհում ժամավաճառությամբ է զբաղվել. Ժաննա Անդրեասյան
ՀՀ կրթության, գիտության, մշակույթի և սպորտի նախարար Ժաննա Անդրեասյանն անդրադարձել է ԵՊՀ-ից հեռացված դոցենտ Սահակ Մանուկյանի գործին՝ հայտարարելով, որ վերջինս բուհում ժամավաճառությամբ է զբաղվել։
Անդրեասյանի խոսքով՝ նախարարությունը ստացել է դասախոսի վերաբերյալ բողոքը և այն ուղարկել է բուհ՝ ուսումնասիրության։ Նա նշել է, որ խնդիրը մեկ միջադեպի մասին չէ, այլ վերաբերում է շարունակական վարքագծին։ «Կրթությունը պետք է ապահովի գիտելիք և կարողություն։ Բուհում ժամավաճառությամբ չպետք է զբաղվել»,- նշել է նախարարը։
Նախարարը հավելել է, որ ուսանողները պետք է լինեն պահանջատեր և չհանդուրժեն վարքագիծ, որը չի համապատասխանում ուսումնական գործընթացին։ Նա նաև դատապարտել է ուսանողներին թիրախավորելու դեպքերը՝ ընդգծելով, որ նրանք իրավունք ունեն բարձրաձայնելու ակադեմիական միջավայրի խնդիրները։
Հիշեցնենք, որ Սահակ Մանուկյանը տեղեկացրել էր իր ազատման մասին՝ նշելով, որ ԵՊՀ ռեկտորի որոշումը պատրաստվում է վիճարկել դատարանում։
