Արշակ արքեպիսկոպոսի գաղտնի նկարահանումը կարող էր իրականացված լինել պետական կառույցների կողմից. Դանիել Իոաննիսյան
«Իրազեկ քաղաքացիների միավորում»-ի համակարգողը նշել է, որ հանցագործության մասին հաղորդում է ներկայացվել, սակայն պաշտոնական արձագանք դեռ չկա:
«Իրազեկ քաղաքացիների միավորում» հասարակական կազմակերպության ծրագրերի համակարգող Դանիել Իոաննիսյանը չի բացառում, որ Արշակ արքեպիսկոպոս Խաչատրյանի գաղտնի տեսագրությունը կարող էր իրականացված լինել պետական որոշ կառույցների կողմից։
Aysor.am-ի հետ զրույցում Իոաննիսյանը նշել է, որ լիարժեք վստահություն չունի և այս պահին իր տրամադրության տակ չկա ավելի մանրամասն տեղեկություն։ Նրա խոսքով՝ դեպքի առնչությամբ ներկայացվել է հանցագործության մասին հաղորդում, որի հիման վրա, ըստ Դատախազության տարածած տեղեկության, վարույթ է արդեն հարուցվել։ Սակայն կազմակերպությունը դեռ չի ստացել պաշտոնական գրություն։
Իոաննիսյանը շեշտել է, որ կատարվածը պետք է մանրակրկիտ քննվի։ «Անկախ այն հանգամանքից, թե ինչ նպատակով է իրականացվել նկարահանումը, այն ապօրինություն է։ Անգամ եթե տեսագրությունը արվել է իրավական հիմքով, դրա տարածումը միանշանակ անօրինական է»,– նշել է նա։
Նա նաև հիշեցրել է, որ Քրեադատավարական օրենսգիրքը պարտադրում է հանցագործության մասին հաղորդումների արագ արձագանք, սակայն պրակտիկայում գործընթացները հաճախ ձգձգվում են։ Իոաննիսյանի խոսքով՝ կազմակերպության նախկին հաղորդումներից մեկի դեպքում պաշտոնական պատասխան չեն ստացել անգամ մեկ ամիս անց։
Հիշեցնենք, որ հոկտեմբերի 25-ին «Armenian WikiLeaks» տելեգրամյան ալիքը հրապարակել էր ինտիմ բնույթի մի քանի տեսանյութ, որտեղ, ըստ պնդումների, պատկերված են Արշակ արքեպիսկոպոս Խաչատրյանը և նրա քեռակինը։ Մինչ այս պահը որևէ պետական մարմին չի հաստատել, թե տեսանկարահանումը կատարվել է իրենց կողմից։
