Քամին վնասներ է պատճառել Երևանում` վնասվել են ծառեր և շինությունների տանիքներ

Հոկտեմբերի 26-ին ուժեղ քամին Երևանում առաջացրել է նյութական վնասներ․ փրկարարները իրականացրել են վերականգնողական աշխատանքներ:

Հոկտեմբերի 26-ին, ժամը 15։55-ից, Ճգնաժամային կառավարման ազգային կենտրոնը մի շարք ահազանգեր է ստացել Երևանի տարբեր հատվածներից՝ քամու հետևանքով առաջացած վնասների վերաբերյալ։

Դեպքի վայրեր են մեկնել ՆԳՆ Փրկարար ծառայության Երևանի փրկարարական վարչության հրշեջ-փրկարարական ջոկատներ և Փրկարարական ուժերի վարչության հատուկ նշանակության փրկարարական խումբը։

Փրկարարներն արձագանքել են բոլոր ահազանգերին՝ կատարելով ծառերի կոտրված ճյուղերի հեռացման, տարածքների սահմանազատման, ինչպես նաև շենքերի տանիքների թուլացած թիթեղների ապամոնտաժման և ամրացման աշխատանքներ։

Նշվում է, որ կատարված աշխատանքների շնորհիվ կանխվել են լրացուցիչ վնասներ և վտանգներ քաղաքացիների ու անցորդների համար։