«Այսօր առավել ևս պետք է խելոք և համախմբված լինենք». Սասուն Միքայելյան

ԵԿՄ նախագահ Սասուն Միքայելյանը Եռաբլուրում լրագրողների հետ զրույցում անդրադարձել է Արցախի թեմային և նշել, որ ժամանակի ընթացքում իր վերաբերմունքը որոշ հարցերի հանդեպ փոխվել է։ «Մարդ է, պահի տակ ասել է՝ «Արցախը Հայաստան է և վերջ»։ Բայց այն ժամանակ, իրոք, ուրիշ ձև էր մտածում։ Եկավ 44-օրյա պատերազմը, եկան խաղեր Արցախի շուրջ՝ Ռուսաստանի մասնակցությամբ, և այս օրն ընկանք»,– ասել է Միքայելյանը։

Նա ընդգծել է, որ ներկայում առավել կարևոր է խելացի և համախմբված մնալը։ «Այսօր առավել ևս մենք պետք է խելոք լինենք, համախմբված լինենք։ Դուք բոլորդ էլ հասկանում եք, ինչ է կատարվում խոշոր տիրույթներում՝ այս մի կտորը պահենք»,– նշել է ԵԿՄ նախագահը։

Սասուն Միքայելյանը կոչ է արել միասնության և սթափ գնահատելու իրավիճակը՝ ընդգծելով, որ երկրի անվտանգությունն ու ինքնիշխանությունը պետք է մնան առաջնահերթ։