«Անձնական կյանքի ցանկացած միջամտություն անընդունելի է և քրեորեն պատժելի». Սրբուհի Գալյան

Արդարադատության նախարար Սրբուհի Գալյանը լրագրողների հետ զրույցում անդրադարձել է հրապարակված կադրերին, որտեղ անվտանգության աշխատակիցը քաղաքացուն դուրս է բերում եկեղեցուց։ «Եթե բռնարարք է եղել, դա քննադատելի և օրենքով պատժելի է։ Չեմ տեսել կադրերը, բայց եթե դեպքը տեղի է ունեցել, իրավապահ մարմինները պետք է քննեն և համապատասխան արձագանք տան»,– նշել է նախարարը։

Գալյանը նաև մեկնաբանել է վերջերս համացանցում տարածված՝ Մայր Աթոռի ներկայացուցչին վերագրվող անձնական տեսանյութը՝ շեշտելով․ «Անձնական կյանքի ցանկացած միջամտություն անընդունելի է և քրեորեն պատժելի։ Եթե տեսանյութը իսկական է, ապա պետք է հարուցվի քրեական գործ»։

Նրա խոսքով՝ պետությունը պարտավոր է պաշտպանել քաղաքացիների անձնական կյանքը և կանխել նմանատիպ դեպքերը։

Գաղտնալսումների թեմայի շուրջ Գալյանը պարզաբանել է, որ նման միջոցառումները կարող են իրականացվել բացառապես դատարանի որոշման հիման վրա։ «Գաղտնալսումները իրականացվում են հատուկ ծառայությունների կողմից՝ հանցագործությունների կանխման կամ բացահայտման նպատակով։ Դատական վերահսկողությունն է քաղաքացիների պաշտպանության գլխավոր երաշխիքը»,– ընդգծել է նա։

Նախարարը հավելել է, որ ինչպես ապօրինի հրապարակումները, այնպես էլ բռնության ցանկացած դրսևորում պետք է ստանան իրավական գնահատական․ «Օրենքի առաջ բոլորը հավասար են։ Անձնական տվյալների ապօրինի օգտագործման կամ տարածման համար պետք է սահմանվի խիստ պատասխանատվություն»,– եզրափակել է Սրբուհի Գալյանը։