Ռուսաստանի և Հայաստանի հարաբերություններում լարվածությունն աճում է. Коммерсантъ

Ռուսաստանը դադարեցրել է Հայաստանից ներմուծված ևս ավելի քան 70 հազար շիշ հանքային և խմելու ջրի, ինչպես նաև զովացուցիչ ըմպելիքների վաճառքը՝ պատճառաբանելով, որ արտադրողները խախտել են արտադրանքի նկատմամբ սահմանված պարտադիր պահանջները։

Սահմանափակումները վերաբերում են «Բժնի» հանքային ջրին, «Просто Азбука» խմելու ջրին և Darbas ապրանքանիշի «Մոխիտո» զովացուցիչ ըմպելիքին։ Ռուսական կողմը հայտարարել է, որ որոշումը կայացվել է Ռուսաստանի քաղաքացիների կյանքի և առողջության համար հնարավոր վտանգները կանխելու նպատակով։

Ռուսական «Կոմերսանտ FM»-ի քաղաքական մեկնաբան Դմիտրի Դրիզեն նշում է, որ այս քայլը տեղի է ունենում Մոսկվայի և Երևանի հարաբերությունների ակնհայտ սրման ֆոնին։ Նրա գնահատմամբ՝ 2026 թվականի օգոստոսի սկզբի դրությամբ սահմանափակումների տակ է հայտնվել Հայաստանի գյուղատնտեսական և սննդամթերքի արտահանման զգալի մասը, իսկ պաշտոնական պատճառաբանությունը շարունակում է մնալ սանիտարական և ֆիտոսանիտարական պահանջների խախտումը։

Մեկնաբանը հիշեցնում է, որ օգոստոսի 2-ին Հայաստանի նախագահ Վահագն Խաչատուրյանը գործող օրենսդրությանը համապատասխան Նիկոլ Փաշինյանին կրկին նշանակել է վարչապետի պաշտոնում։ Նրա կարծիքով՝ դրանից հետո ռուսական սահմանափակումները կարելի է դիտարկել նաև քաղաքական համատեքստում։

Դրիզեն նշում է, որ Նիկոլ Փաշինյանը նախկինում հայտարարել էր, թե Հայաստանը չի պատրաստվում ընտրություն կատարել Եվրամիության և Եվրասիական տնտեսական միության միջև՝ մերժելով Մոսկվայի պահանջները։ Բացի այդ, վարչապետը չի բացառել նաև Ռուսաստանից տարեկան 2 միլիարդ դոլար պահանջելու հնարավորությունը՝ հայկական երկաթուղու օգտագործման դիմաց, ինչը դժգոհություն է առաջացրել «Ռուսական երկաթուղիներ» ընկերությունում։

Մեկնաբանի գնահատմամբ՝ առաջիկայում երկու երկրների հարաբերությունները կարող են շարունակել վատթարանալ։ Նրա խոսքով՝ օրակարգում կարող է հայտնվել նաև Գյումրիում տեղակայված ռուսական ռազմաբազայի հարցը, ինչպես նաև Հայաստանի մուտքի կարգի փոփոխությունը Ռուսաստանի քաղաքացիների համար։

Դրիզեն ուշադրություն է հրավիրում նաև այն հանգամանքին, որ Հայաստանը Իրանի հետ իրականացնում է «գազ՝ էլեկտրաէներգիայի դիմաց» ծրագիրը, ինչը նպաստում է ռուսական գազից կախվածության նվազեցմանը։ Նրա խոսքով՝ այս գործընթացը կարող է փոխել տարածաշրջանային ուժերի հավասարակշռությունը և նոր լարվածություն ստեղծել Ռուսաստանի ու Հայաստանի հարաբերություններում։