Կասկադի անավարտ հատվածում Երևանի քաղաքապետարանի համար կկառուցվի 36․000 մ² կոմպլեքս. քաղաքապետ

Երևանի քաղաքապետ Տիգրան Ավինյանը սոցցանցի իր էջում հայտնել է, որ  քննարկելու են Կասկադ համալիրի անավարտ հատվածի վերակառուցման ծրագիրը։

«Գրեթե մեկ տարի տևած քննարկումներն ու համառ աշխատանքը մեզ բերել են այս կարևոր հանգրվանին։ Սա մի գործընթաց էր, որի հաջողության հանդեպ շատերը թերհավատ էին, բայց մենք հավատացինք, աշխատեցինք ու Կասկադի նախագծի իրականացման հարցը այսօր պաշտոնապես հաստատվելու է»,- գրել է նա։

Արդեն ավագանու նիստում քաղաքապետը հայտարարել է․

«Կասկադ անավարտ հատվածում Երևանի քաղաքապետարանի համար կառուցվելու է մոտ 36000 մ² կոմպլեքս, որը ունենալու է 1000 տեղանոց հանդիսությունների և երաժշտական դահլիճ, թանգարանային հատված, հասարակական հատվածներ»,-  հայտարարել է Երևանի քաղաքապետ Տիգրան Ավինյանը։

Նա ընդգծել է, որ հարակից հատվածում Երևանի քաղաքապետարանը հնարավորություն է տալու կառուցել 125-135 հզ. մ² բիզնես նպատակներով կոմպլեքս։

«Հուսով ենք, 4-5 տարվա ընթացքում կունենանք Կասկադի ավարտական նախագիծը»,-նշել է նա։