Մամիկոն Ասլանյանն արձագանքել է իր դեմ նախաձեռնված նոր քրեական վարույթին

Վանաձորի նախկին քաղաքապետ Մամիկոն Ասլանյանը լրագրողների հետ զրույցում անդրադարձել է Հակակոռուպցիոն կոմիտեի տարածած հաղորդագրությանը՝ իր դեմ հարուցված նոր քրեական վարույթի վերաբերյալ։

«Նույն հաջողությամբ կարող էին ասել՝ Վանաձոր համայնքի 3000 հեկտար հողից կամ ՀՀ-ի 29 հազար 743 քառակուսի կմ-ից Ասլանյանը առանձնացրել է 3 հատ 20 քմ տարածք։ Դա ինչ ասելու բան է, եթե պիտի օտարում արվի կամ վարձակալության տրվի, պիտի առանձնացվի»,- նշել է Վանաձորի նախկին քաղաքապետը։

Նա նաև ավելացրել է. «Որ իմ մասին այդ նյութը լսում էի, ինքս մի ձևի եղա ահասարսուռ այդ ձայնից։ Ինչևէ , սա նորություն չէ, սա խոսում է իրավաբանական համայնքի կողմից նման մեթոդներով քրեական իրավունքին վերաբերվելու ցածր որակների մասին։ Ո՛չ զարմանալու, ո՛չ էլ ահաբեկվելու պատճառ չեմ տեսնում, վերջին տարիներին սովորական երևույթ է դարձել։ Մենք այս երկրում ենք ապրում, այսօր այս բարքերն են տիրում»։

Խոսելով ԿԸՀ-ում քննվող՝ Նարեկ Կարապետյանին վերաբերող միջնորդության մասին՝ Ասլանյանը ընդգծել է, որ հանձնաժողովն այս պահին նման հարց քննարկելու իրավասություն չունի։

«Մանդատների տրման մասին որոշումից հետո դա արդեն ապագա ԱԺի որոշելիքն է»,- հավելել է նա։