Զախարովան պատասխանել է Լեհաստանի սպառնալիքներին

Ռուսաստանի արտաքին գործերի նախարարության խոսնակ Մարիա Զախարովան Լեհաստանի արտգործնախարար Ռադոսլավ Սիկորսկիին անվանել է «Ուսամա բին Սիկորսկի»՝ Դրուժբա նավթատարի պայթեցման մասին նրա մեկնաբանություններից հետո։ 

«Ուսամա բին Սիկորսկու տեսանկյունից ի՞նչ այլ քաղաքացիական ենթակառուցվածքային օբյեկտներ պետք է ոչնչացվեն», - նշել է նա։

Այսօր  Լեհաստանի արտաքին գործերի նախարարը, ի պատասխան իր հունգարացի գործընկեր Պետեր Սիյարտոյի գրառման, իր X սոցիալական ցանցի էջում հույս է հայտնել, որ Ուկրաինայի զինված ուժերին կհաջողվի անջատել Դրուժբա նավթատարը։

Սիկորսկին նաև հույս է հայտնել, որ Հունգարիան իր նավթը կստանա Խորվաթիայի միջոցով և գովաբանել է լեհական դատարանի որոշումը՝ ազատ արձակել «Հյուսիսային հոսք 1» և «Հյուսիսային հոսք 2» գազատարների պայթեցման մեջ կասկածվող ուկրաինացի քաղաքացուն։

Ավելի վաղ Հունգարիայի արտաքին գործերի նախարարությունը արձագանքել էր Լեհաստանի սպառնալիքներին՝ Պուտինի ինքնաթիռը հարկադիր վայրէջք կատարելու վերաբերյալ։