Ղարիբաշվիլին հորդորել է Զելենսկիին «վերահսկել իր երկիրը»
Վրաստանի վարչապետ Իրակլի Ղարիբաշվիլին հարցազրույց է տվել կառավարամետ «Իմեդի» հեռուստաալիքին, որտեղ փորձել է բացատրել, թե ով է կանգնած Թբիլիսիում մարտյան ցույցերի հետևում։ Վրաստանի կառավարության ղեկավարը «արմատական ընդդիմությանը» անվանել է և՛ ծայրահեղական, և՛ Վրաստանի ոչ կառավարական կազմակերպություն, գրում է SOVA-ն։
«Մենք բազմաթիվ քննադատություններ լսեցինք, որ ոստիկանությունը չափն անցել է։ Սա սուտ է և անհեթեթություն։ Ո՞վ է սկսել բռնությունը։ Բռնություն է սկսել Ազգային շարժման երիտասարդական թեւը, բոլորս նրանց անուններով գիտենք։ Բռնությունը սկսեց այսպես կոչված «Գիրչի» շարժումը, Ջափարիձեի շարժումը և «անարխիստները» Ֆրանկլինի ակումբից։ Ես ապշեցի, երբ տեսա մի քանի ցուցարարների լուսանկարներ, նրանք ինչ-որ սատանիստների տեսքով էին: Այս կազմակերպությունը՝ հավաքական ազգային շարժումը, արդեն վերածվել է ծայրահեղական կազմակերպության և գտնվում է ահաբեկչական դառնալու եզրին»,- ասել է Ղարիբաշվիլին։
Միևնույն ժամանակ, Վրաստանի վարչապետը ևս մեկ անգամ ասել է, թե ուկրաինացի քաղաքական գործիչները ձգտում են Վրաստանին ներքաշել պատերազմի մեջ։
«Երբ պատերազմի մեջ գտնվող մարդը ժամանակ է գտնում մեկնաբանելու Վրաստանում մի քանի հազար մարդու մասնակցությամբ ավերիչ գործողությունը, սա ուղղակի ապացույց է, որ այդ մարդը ներգրավված է և ցանկանում է, որ ինչ-որ բան տեղի ունենա այստեղ, փոխվի: Դուք նշեցիք մի քանի օտարերկրյա քաղաքական գործիչների, խոսեցին Կլիչկոն, Ֆեյգինը, որոշ տարօրինակ մարդիկ, Արախամիան և որոշ պարտվողներ, ովքեր ասացին, որ փոփոխություններ և իշխանափոխություն է պետք, նայեք ձեր երկրին, մենք կնայենք մերին»,- ասել է Ղարիբաշվիլին։
Հիշեցնենք՝ օրեր առաջ Ուկրաինայի նախագահ Վլադիմիր Զելենսկին աջակցություն էր հայտնել Վրաստանին և ասել, որ բոլոր ուկրաինացիները իրենց վրացի ընկերների համար ցանկանում են ժողովրդավարական հաջողություններ և առաջընթաց եվրաինտեգրման հարցում։
Նշենք, որ օրեր շարունակ Վրաստանում զանգվածային ցույցեր էին ընթանում։ Հարյուրավոր ցուցարարներ խորհրդարանի դիմաց պահանջում էինք հետ կանչել «օտարերկրյա գործակալների մասին» օրենքի նախագիծը։
