Գյումրիում իրավիճակը շարունակում է լարված մնալ
Այս պահին լարված է ոչ միայն Գյումրիի համայնքապետարանի դրսում, այլեւ ներսում։ Աշխատակիցների և դիմակավորված ուժայինների միջև քաշքշոց է տեղի ունեցել։
Քաղաքի բնակիչները հավաքվում են համայնքապետարանի դիմաց, որտեղ մեծ թվով ոստիկաններ կան։ Քիչ առաջ եւս երկու ավտոբուս ոստիկանական ուժեր են եկել։ Իրավապահները փակել են համայնքապետարանի մուտքի դուռը և թույլ չեն տալիս մարդկանց, այդ թվում համայնքապետարանի աշխատակիցների ելքն ու մուտքը։
Հավաքվածները սուլում են ոստիկաններին ու վանկարկում՝ «ամոթ»։ Ըստ համայնքապետարանի աշխատակիցների՝ համայնքապետ Վարդան Ղուկասյանը շենքում է, նրա դռան մոտ հսկողություն է սահմանվել։ Նրան, ըստ էության, մեկուսացրել են, իսկ դռան մոտ հավաքված աշխատակիցները մտավախություն ունեն, որ համայնքապետին ցանկանում են ձերբակալել։
Ավելի վաղ հայտնել էինք, որ քրեական ոստիկանության աշխատակիցները վաղ առավոտյան մտնել են Գյումրիի համայնքապետարան։ Դիմակավորված հատուկջոկատայինները արգելել են աշխատակիցների ելքնումուտքը։ Աշխատակիցները հայտնել էին, որ դեռ որևէ տեղեկություն չունեն, թե ինչ գործի շրջանակում են նրանք ժամանել։
