Արագածոտնի թեմում իրականացված խուզարկության հետքերով. դիվանագիտական անձնագիրն անվավեր է․ ԱԳՆ

Դիվանագիտական անձնագիրը, որը հայտնաբերվել է Արագածոտնի թեմի առաջնորդարանում և հոգևորականների տներում անցկացված խուզարկությունների արդյունքում, գործող չէ։ Radar Armenia-ին այս մասին հայտնել են ՀՀ արտաքին գործերի նախարարությունից։

«Քննչական կոմիտեի հրապարակած նկարում երևացող դիվանագիտական անձնագիրը տրամադրված է եղել 2013 թվականին, և դրա վավերականությունը լրացել է 2018 թվականին»,- ասել են գերատեսչությունից։

Հիշեցնենք` հոկտեմբերի 15-ի վաղ առավոտյան իրավապահները խուզարկություն իրականացրին Արագածոտնի թեմի առաջնորդ Մկրտիչ եպիսկոպոս Պռոշյանի տանը, ապա բերման ենթարկեցին նրան։ Սրբազանից բացի, բերման ենթարկվեցին նաև Արագածոտնի թեմի 12 քահանաներ և առաջնորդարանի աշխատակիցներ։ Ավելի ուշ ՔԿ–ն հայտնեց, որ 3-ը ձերբակալվել են, որոնցից մեկը թեմի առաջնորդն է։ Նրա նկատմամբ հանրային քրեական հետապնդում է հարուցվել ՔՕ 2 հոդվածներով՝ պաշտոնեական դիրքն օգտագործելով ընտրական իրավունքի իրականացումը խոչընդոտելը, իշխանական կամ ծառայողական լիազորություններն օգտագործելով հավաքներին մասնակցելուն հարկադրելը։

Քննչական կոմիտեի փոխանցմամբ՝ երկու տասնյակից ավելի խուզարկություններ են կատարվել, որոնց արդյունքում հայտնաբերվել և վերցվել են քրեական վարույթի համար նշանակություն ունեցող փաստաթղթեր, էլեկտրոնային տեղեկատվություն պարունակող կրիչներ, առանձնապես խոշոր չափերով գումար, ոսկյա, արծաթյա մեծաքանակ զարդեր, վառելիքի կտրոններ, այլ իրեր ու առարկաներ: ՔԿ-ի հրապարակած լուսանկարներում նաև դիվանագիտական անձնագիր կար։