Տեր Արամ քահանա Ասատրյանը կարծում է, որ իր հայտարարությունը պիտի քննվի

Հովհաննավանքի հոգևոր հովիվ Տեր Արամ քահանա Ասատրյանը չի զղջում, որ իր հայտարարության հիման վրա քննություն է տարվում։ Նա այս մասին հայտնել է լրագրողներին` անդրադառնալով այսօր վաղ առավոտից տեղի ունեցող իրադարձություններին, մասնավորապես՝ խուզարկություններին և հոգևորականների, այդ թվում՝ Արագածոտնի թեմի առաջնորդի ձերբակալությանը։

Արամ քահանա Ասատրյանը կարծում է, որ իր հայտարարությունը պետք է քննվեր։

«Ոչ միայն այս թեման։ Եթե եղել են ազատության, խոսքի, իրավունքի վերաբերյալ ճնշումներ, պիտի քննվի»,– ասել է նա։

Հարցին` ինչու չի գնացել Մայր աթոռի Պարգևների շնորհման և կարգապահական հարցերի հանձնախմբի հրավիրած քննարկմանը, քահանան պատասխանեց, որ իրեն դեռ նորմալ հրավեր չի արվել, քննարկման պատճառը չի նշվել։

«Հանձնախումբը նախ պետք է հրավիրի այն եպիսկոպոսին, որը դարձել է այս ամեն ինչի պատճառը (Արագածոտնի թեմի առաջնորդ Մկրտիչ սրբազանին նկատի ունի– խմբ․)»,- նշել է քահանան։

Հիշեցնենք`  Հովհաննավանքի հոգևոր հովիվ տեր Արամը սեպտեմբերի 16-ին «Հանրային» ՀԸ եթերում հայտարարել էր, որ «2021 թվականի ընդդիմության ցույցերին մասնակցել է ոչ իր ցանկությամբ»։ Այս հայտարարությունից հետո «Իրազեկ քաղաքացիների միավորում» ՀԿ–ն հաղորդում է ներկայացրել դատախազություն։ Հաղորդման հիման վրա հարուցվել է վարույթ, այսօր քննչական գործողություններ են սկսվել Արագածոտնի թեմում։