Միացյալ Նահանգների և թմրավաճառների միջև զինված հակամարտությունը սկսված է․ Թրամփ
ԱՄՆ նախագահ Դոնալդ Թրամփը հայտարարել է, որ երկիրը գտնվում է թմրանյութերի կարտելների հետ զինված հակամարտության մեջ։ Այս մասին հաղորդում է The New York Times-ը, որը ծանոթացել է ամերիկացի առաջնորդի Կոնգրեսին ուղղված ծանուցմանը։
Թերթի տվյալներով ՝ թմրակարտելների դեմ արշավի նոր կարգավիճակը պետք է իրավաբանական հիմնավորում դառնա Կարիբյան ծովում նավերին ավելի վաղ հասցված հարվածների համար:
Թրամփը հայտարարել է, որ կարտելների ներկայացուցիչների գործողությունները կհամարվեն զինված հարձակում Միացյալ Նահանգների դեմ, իսկ մաքսանենգները՝ անօրինական մարտիկներ։
Հավելենք՝ ԱՄՆ ռազմածովային ուժերն արդեն Կարիբյան ծովի միջազգային ջրերում ոչնչացրել են առնվազն երկու արագընթաց նավ՝ ընդհանուր առմամբ 14 հոգանոց անձնակազմով, որոնք, թմրանյութեր էին տեղափոխում Վենեսուելայից:
