Ամերիկան Ուկրաինային կտրամադրի հետախուզական տվյալներ՝ Ռուսաստանին խորը հարված հասցնելու համար

ԱՄՆ-ն Ուկրաինային կտրամադրի հետախուզական տվյալներ՝ Ռուսաստանի էներգետիկ ենթակառուցվածքների դեմ հեռահար հրթիռային հարվածների վերաբերյալ։ Այս մասին հայտնել է The Wall Street Journal-ը՝ հղում անելով ԱՄՆ պաշտոնյաների հայտարարություններին։

Հաղորդագրության համաձայն, երկրի պաշտոնյաները կոչ են անում ՆԱՏՕ-ի երկրներին նմանատիպ աջակցություն ցուցաբերել։

Ինչպես նշում է թերթը՝ հղում անելով անանուն աղբյուրներին, Ուկրաինային լրացուցիչ հետախուզական տվյալներ տրամադրելու թույլտվությունը տրվել է Թրամփի սոցիալական ցանցում տարածած հաղորդագրությունից կարճ ժամանակ առաջ, որում նշվում էր, որ Ուկրաինան կարող է վերադարձնել Ռուսաստանի կողմից օկուպացված բոլոր տարածքները։

Հաղորդվում է նաև, որ Թրամփի վարչակազմը քննարկում է Ուկրաինային զենք մատակարարելու հնարավորությունը, որը թույլ կտա նրան հարվածել Ռուսաստանի ներսում ավելի շատ թիրախների։

Սա վերաբերում է այնպիսի թևավոր հրթիռների մատակարարմանը, ինչպիսիք են «Tomahawk» և «Barracuda», որի վերաբերյալ վերջնական որոշում դեռևս չի կայացվել։