Կապանը և Գորիսը կունենան հավելյալ շտապօգնության ամենագնաց մեքենաներ. նախարար
Երեկ իմ տեղակալը եղել է Սյունիքոււմ, Վայոց ձորում, մենք պարբերաբար իրականացնում ենք տեղում կարիքների գնահատում եւ օպերատիվ դրանք բավարարվում են: Այս մասին այսօր՝ նոյեմբերի 17-ին, ԱԺ-ում լրագրողների հետ զրույցում նշեց առողջապահության նախարար Անահիտ Ավանեսյանը՝ անդրադառնալով նրան, որ Սյունիքի որոշ գյուղերի ճանապարհներ դեպի Կապան փակվել է եւ 150 կմ պետք է կտրեն, որ հասնեն, Կապան, արդյոք շտապօգնության մեքենաները կարողանում են ժամանակին հասնել հիվանդներին:
«Բոլոր այդ համայնքները կապահովվեն իրենց անհրաժեշտ առաջին բուժօգնության պարագաներով: Եվ Կապանի, եւ Գորիսի շտապօգնության կենտրոնները կունենան հավելյալ շտապօգնության ամենագնաց մեքենաներ: Դրանք արդեն տրամադրվել են, էլի կտրամադրվեն: Տվյալ համայնքների առողջության ամբողջական ապահովումը կկազմակերպվի: Տեղ հասնելու խնդիր չկա»:
