Մի բան, որ երբեք չի եղել Ազգային ժողովի պատմության մեջ․ Հայկ Մամիջանյան
Ազգային ժողովի կողմից նշանակված մարդիկ ամեն կերպ փորձել են խոչընդոտել լսումների կազմակերպումը․ այս մասին խորհրդարանական լսումների ժամանակ, հայտարարել է «Պատիվ ունեմ» խմբակցության ղեկավար Հայկ Մամիջանյանը։
«Նախ՝ սկսենք նրանից, որ շուրջ 300 հոգի գրանցվել էր՝ մասնակցելու լսումներին, սակայն նրանցից հաստատվել է ընդամենը 160-ի ներկայությունը՝ մի բան, որ երբեք չի եղել ԱԺ պատմության մեջ․ լսումների ժամանակ մշտապես ավելի մեծ թվով մարդկանց էին ներս թողնում։ Իսկ մինչ այդ փորձում էին առհասարակ մերժել և չտրամադրել լսումների հնարավորություն։ Այնուամենայնիվ, մենք հասել ենք մեր նպատակին, և վստահ եմ, որ կունենանք արդյունավետ աշխատանք»,- ասել է Մամիջանյանը։
Վարչապետին իմպիչմենտ հայտնելու նպատակով կազմակերպված խորհրդարանական լսումներին առաջինը ելույթ ունեցավ Հայկ Մամիջանյանը՝ նշելով, որ «իմպիչմենտ նախաձեռնելու դրդապատճառը մեր երկրում կառավարիչների հակապետական գործողություններին հակազդելն է, և իրենք արել են ամեն ինչ, որպեսզի խորհրդարանական և արտախորհրդարանական ընդդիմադիր ուժերը մեկ վայրում կարողանան քննարկել իշխանափոխության հասնելու գործնական լուծումներ»:
Լսումների նախապատրաստական փուլում, ըստ Մամիջանյանի, Հանրապետական կուսակցությունն իրականացրել է հանդիպումներ, կոնսուլտացիաներ արտախորհրդարանական ուժերի հետ՝ ապահովելու համար ընդդիմադիր դաշտի ամբողջական ներկայացվածությունը։
