ՌԴ իշխանությունները բաց մեսիջ են հղում Ալիևին․ «Հրապարակ»
Սեպտեմբերի 7-ին Մոսկվայում Ռուսաստանի հայերի միության համագումարը և 25-ամյակի միջոցառումը տեղի ունեցան Կրեմլի համագումարների պալատի դահլիճում: ՌԴ նախագահի աշխատակազմի ղեկավարի տեղակալը կարդաց Պուտինի շնորհավորանք-ուղերձը, ապա մեծ համերգ էր՝ ռուսական էստրադայի և հայկական մանկական համույթների մասնակցությամբ: Սա շարքային միջոցառում կլիներ, եթե դրան զուգահեռ ամբողջ Ռուսաստանի տարածքով ադրբեջանական համայնքի ներկայացուցիչները չենթարկվեին քրեական հետապնդման, չզրկվեին ՌԴ քաղաքացիությունից: Այս մասին գրում է «Հրապարակ» թերթը։
ՌԴ իշխանությունները բաց մեսիջ են հղում Ալիևին, որ չեն պատրաստվում նրա թելադրած խաղի կանոններով խաղալ, բայց քանի որ Հայաստանի իշխանություններն էլ իրենց աչքի լույսը չեն, որպես հակակշիռ` Ռուսաստանում ապրող հայերին են սիրաշահում: Նախկինում նման իրավիճակներում ուղիղ աջակցում էին ՀՀ իշխանություններին, ինչը պաշտոնական Բաքվի կողմից ընկալվում էր որպես զգուշացում, ու արագորեն սկսում էին վերականգնել խախտված բալանսը, որ հայերը չշահեին, և ՀՀ-ի օգտին ՌԴ-ն քայլեր չձեռնարկեր:
Հիմա քողարկված մեսիջներ են ուղարկվում Ադրբեջանին, և իրավիճակն առավել քան սրվել է: Օրինակ, Կրոկուսի սեփականատեր՝ Ալիևի նախկին խնամի Ագալարովների գույքն են պետականացնում, արդեն փակվել են Ագալարովին պատկանող մեկ տասնյակ ռեստորաններ Մոսկվայում, համակերպվել են «Կրոկուս սիթի հոլը» կորցնելու մտքի հետ և լքել են ՌԴ-ն:
Ադրբեջանական համայնքի 2 ղեկավար զրկվել է քաղաքացիությունից, բազմաթիվ էթնիկ ադրբեջանցիների նկատմամբ քրեական գործեր են հարուցվել, կան կալանավորվածներ: Որպես դրա շարունակություն՝ Ռուսաստանը շեշտված սկսել է կարևորել Ռուսաստանի հայերի միության դերը, իսկ միության նախագահ Արա Աբրահամյանն արժանանում է հատուկ վերաբերմունքի»։
