Արաբական լիգան հայտարարություն է տարածել. Իսրայելին մեծ վտանգ է սպառնում
Կատարի դեմ Իսրայելի ագրեսիան սպառնում է արաբական և իսլամական երկրների հետ ունեցած հարաբերություններին և խաթարում է նրա հետ գործող համաձայնագրերը։ Այս մասին ասվում է Արաբական պետությունների լիգայի (ԱՊԼ) և Իսլամական համագործակցության կազմակերպության (ԻՀԿ) գագաթնաժողովի եզրափակիչ հայտարարության նախագծում։ Փաստաթղթից հատվածներ է փոխանցում Al Arabiya հեռուստաալիքը։
Փաստաթղթի նախագծում նշվում է, որ Կատարի տարածքի վրա Իսրայելի հարձակումը «համարվում է ագրեսիա բոլոր արաբական և իսլամական պետությունների դեմ» և «խաթարում է խաղաղության և համակեցության հնարավորությունները»։
Հավելենք՝ Դոհայում տեղի է ունեցել արաբական և իսլամական երկրների արտաքին գործերի նախարարությունների ղեկավարների հանդիպում, որը նվիրված է Կատարի մայրաքաղաքում Համասի նստավայրին հասցված Իսրայելի հարվածին: Ավելի վաղ Կատարի արտաքին գործերի նախարարության պաշտոնական ներկայացուցիչ Մաջիդ բին Մոհամմեդ ալ-Անսարին հայտարարել էր, որ մասնակիցները կպատրաստեն վերջնական բանաձևի նախագիծ Արաբական լիգայի և ԻՀԿ գագաթնաժողովի համար, որը տեղի կունենա Դոհայում սեպտեմբերի 15-ին:
