Փաշինյանը մանրամասներ է ներկայացրել իր և Փեզեշքիանի բանկացություններից

ՀՀ վարչապետ Նիկոլ Փաշինյանն ու Իրանի նախագահ Մասուդ Փեզեշքիանը հանդես են եկել հայտարարություններով։

«ՀՀ-ն և ողջ հայ ժողովուրդը բարձր են գնահատում Իրանի հստակ դիրքորոշումը ՀՀ տարածքային ամբողջականության, ինքնիշխանության և սահմանների անձեռնմխելիության նկատմամբ։ ՀՀ-ի և Իրանի համար մեր պետությունների միջև միջազգային սահմանների անքակտելիությունն ու անխափան հաղորդակցությունն ունի կենսական նշանակություն։ Վերոնշյալի համատեքստում պարոն նախագահին ներկայացրել եմ օգոստոսի 8-ին ստորագրված համատեղ հռչակագրի, ինչպես նաև՝ ՀՀ և Ադրբեջանի միջև խաղաղության և միջպետական հարաբերությունների հաստատման մասին նախաստորագրված համաձայնագրի մանրամասները։ Այս գործընթացը միտված է մեծ հեռանկարներ բացել ողջ տարածաշրջանի տնտեսական զարգացման համար։ Ես ուրախ եմ և շնորհակալ նախագահ Փեզեշքիանին՝ այս համաձայնությունների մասին իր օբյեկտիվ գնահատականների համար»,– ասել է վարչապետ Փաշինյանը։

Անդրադառնալով Ադրբեջանի հետ հաղորդակցության ուղիների վերաբացման մասին համաձայնագրին՝ նա նշել է. «Ադրբեջանի հետ մեր առանցքային համաձայնագրերից մեկը տարածաշրջանում հաղորդակցության ուղիների վերաբացման մասին է՝ երկրների ինքնիշխանության, իրավազորության և տարածքային ամբողջականության նկատմամբ լիակատար, փոխադարձ հարգանքով։ Գործնականում սա նոր դռներ կբացի ՀՀ և Իրանի միջև երկաթուղային համագործակցության համար, այդ թվում՝ Նախիջևան-Ջուլֆա երկաթգծի միջոցով, ինչը կնշանակի Իրանի երկաթուղային հասանելիություն դեպի ՀՀ և ի, վերջո, դեպի Սև ծով։ Վստահ ենք, որ տարածաշրջանային ենթակառուցվածքների ապաշրջափակումը կծառայի մեր տարբեր գործընկերների միջև երկխոսության խթանմանը»։

Նիկոլ Փաշինյանը նաև վստահեցրել է. «ՀՀ-ով անցնող հաղորդակցության ուղիները գտնվելու են բացառապես ՀՀ իրավազորության ներքո, անվտանգությունը ապահովելու է Հայաստանը, ոչ թե երրորդ երկիր»։