Պուտինի և Թրամփի միջև բանակցությունները կարող են տևել 6-7 ժամ. Պեսկով

Ռուսաստանի նախագահի մամուլի քարտուղար Դմիտրի Պեսկովը ՌԴ «Առաջին ալիք»-ին տված մեկնաբանության մեջ խոստովանել է, որ Ռուսաստանի նախագահ Վլադիմիր Պուտինի և նրա ամերիկացի գործընկեր Դոնալդ Թրամփի միջև Ալյասկայում կայանալիք գագաթնաժողովը կտևի ընդհանուր առմամբ մոտ 6-7 ժամ՝ նախատեսված միջոցառումների մեծ թվի պատճառով։

Նրա խոսքով՝ Մոսկվան ենթադրում է, որ առաջնորդները նախ անձնական զրույց կունենան։ «Այս պահին, կարծես, դրան կմասնակցեն նաև օգնականները», - հավելել է Պեսկովը։

«Այնուհետև բանակցություններ կլինեն պատվիրակությունների շրջանակներում, հնարավոր է՝ աշխատանքային ճաշի ձևաչափով։ Այնուհետև առաջնորդները որոշ ժամանակով կցրվեն, ապա կհավաքվեն համատեղ մամուլի ասուլիսի», - նշել է Կրեմլի խոսնակը։

Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի հանդիպումը տեղի կունենա այսօր Ալյասկայի Անքորիջ քաղաքում գտնվող ԱՄՆ ռազմաօդային ուժերի և բանակի Էլմենդորֆ-Ռիչարդսոն համատեղ բազայում։ Ռուսաստանի նախագահի օգնական Յուրի Ուշակովի խոսքով՝ առաջնորդները կկենտրոնանան ուկրաինական կարգավորման քննարկման վրա։ Նրա խոսքով՝ Պուտինը և Թրամփը կքննարկեն նաև տնտեսական ոլորտում երկկողմ համագործակցությունը։