Ռուսաստանը սպասում է Ուկրաինայի հետ բանակցությունների հաջորդ փուլին. Պեսկով

«Ռուսաստանն առաջվա պես սպասում է Ուկրաինայի հետ բանակցությունների հաջորդ փուլի ժամկետի վերաբերյալ առաջարկի, սակայն Կիևը չի շտապում»,-  հայտարարել է ՌԴ նախագահի մամուլի քարտուղար Դմիտրի Պեսկովը։

«Մենք նախկինի պես սպասում ենք բանակցությունների երրորդ փուլի ժամկետների վերաբերյալ առաջարկի», – հավելել է Պեսկովը։

Նա մեկնաբանել է նաև ԱՄՆ նախագահ Դոնալդ Թրամփի` Ուկրաինային «Patriot» համակարգեր ուղարկելու մտադրության մասին հայտարարությունը` ընդգծելով, որ ամերիկյան զենքն ու ռազմական տեխնիկան շարունակվում են մատակարարվել Ուկրաինա։

«Փաստը մնում է փաստ, որ զենքի, հանդերձանքի և ռազմական տեխնիկայի մատակարարումն ԱՄՆ–ի կողմից շարունակվում է», – ասել է Պեսկովը։

Հիշեցնենք` Ռուսաստանն ու Ուկրաինան Ստամբուլում ուղիղ բանակցությունների երկու փուլ են անցկացրել, որոնց արդյունքում գերիների փոխանակում է իրականացվել: