Պեսկովն ափսոսանք է հայտնել Փաշինյանի որոշման կապակցությամբ

«Իհարկե, ցավալի է, բայց Հայաստանը, այնուամենայնիվ, ներկա կլինի տեսակոնֆերանսի միջոցով: Հայաստանը ԵԱՏՄ անդամ է, կարևոր անդամ, ԵԱՏՄ-ին անդամակցությունն ամեն տարի վստահորեն մի քանի տոկոս է ավելացնում Հայաստանի տնտեսության աճին»,- լրագրողներին ասել է Պեսկովը։

ՌԴ նախագահի մամուլի քարտուղար Դմիտրի Պեսկովը ափսոսանք է հայտնել, որ Հայաստանի վարչապետ Նիկոլ Փաշինյանը չի մասնակցելու Մինսկում կայանալիք Եվրասիական տնտեսական միության գագաթնաժողովին։

Նրա խոսքով, Հայաստանը ԵԱՏՄ-ին անդամակցությունից մեծ դիվիդենտներ է ստանում ազգային տնտեսության համար։

Հիշեցնենք, որ Երևանի և Մինսկի հարաբերություններում լարվածություն առաջացավ Բելառուսի նախագահի կողմից ղարաբաղյան պատերազմի արդյունքների վերաբերյալ գնահատականներից հետո։ Ավելի ուշ Փաշինյանն ասել է, որ Բելառուսի ղեկավարը փաստացի խոստովանել է, որ օգնություն է ցուցաբերել Ադրբեջանին, և արգելել է պաշտոնյաներին մեկնել Բելառուս, քանի դեռ Ալեքսանդր Լուկաշենկոն այնտեղ նախագահ է։ Երևանը հետ է կանչել նաև իր դեսպանին։