Թրամփը և Ծինփինը հեռախոսազրույց կունենան

ԱՄՆ նախագահ Դոնալդ Թրամփի և Չինաստանի նախագահ Սի Ծինփինի հեռախոսազրույցը տեղի կունենա երեքշաբթի։ Այս մասին ամերիկյան Politico թերթին տված բաց առցանց հարցազրույցում ասել է ամերիկացի առաջնորդի՝ առևտրի և արտադրության հարցերով ավագ խորհրդական Փիթեր Նավարոն։

Նրան հարցրել են ամերիկյան ձեռներեցների համար նավթի, գյուղատնտեսական տեխնիկայի, ածուխի և հեղուկ գազի վրա Չինաստանի պատասխան մաքսատուրքերի հնարավոր հետևանքների մասին։

«Մենք կտեսնենք, թե ուր կհասնի այս խոսակցությունն այսօր»,- ասել է Նավարոն՝ ուղղակիորեն չպատասխանելով այն հարցին, թե արդյոք Թրամփը կարող է դադարեցնել Չինաստանի նկատմամբ մաքսատուրքերը, ինչպես արեց Մեքսիկայի և Կանադայի հետ։

Թրամփի խորհրդականին նաև հարցրել են՝ արդյոք վարչակազմը դեռ քննարկում է չինական ապրանքների համար 60% մաքսատուրքեր սահմանելու հարցը։ Նա ասել է, որ Վաշինգտոնի ղեկավարությունը կդիմի «չափորոշված, հետազոտությունների վրա հիմնված մոտեցման»: