Տիրան Խաչատրյանին մեղսագրվում է արարք, որը կալանք չի ենթադրում. փաստաբան
Գեներալ- լեյտենանտ Տիրան Խաչատրյանին կալանքի այս միջնորդությունը ընդհանրապես չպետք է ներկայացվեր։ Այս մասին լրագրողների հետ զրույցում ասել է փաստաբան Արմեն Անդրիկյանը:
«Մենք գործ ունենք անզգուշությամբ կատարված ենթադրյալ հանցանքի հետ, որը միջին ծանրության հանցագործություն է, որի դեպքում կալանքի միջնորդություն պետք է ներկայացվի միայն այն դեպքում, երբ որ հստակ հիմնավորում կա»,- ասել է նա:
Իր խոսքով` նախաքննական մարմինը գնահատականներ է տվել Տիրան խաչատրյանի գործունեությանը, որը «իրականությանը չի համապատասխանում»։
«Մեղադրանքը առաջադրվել է Քր, օրենսգրքի գործող 550 հոդվածի 3-րդ մասի հիմքով, այն է՝ պաշտոնական անփութությունը, 3-րդ մասն էլ ծանրացնող հանգամանք որպես ռազմական դրության ժամանակ կատարված այսպես կոչված հանցանք: Պարոն Խաչատրյանը չի ընդունում մեղադրանքը»,-ասել է նա:
Փաստաբանը նշել է, որ գործով Տիրան Խաչատրյանը վկայի կարգավիճակ է ունեցել, ցուցմունքներ է տվել:
