Իրանը լրջորեն զբաղվում է այդ հարցով. Իրանի ԱԳՆ

Դամասկոսում Իրանի դեսպանատան տեխնիկական աշխատակիցը զոհվել է դեկտեմբերի 15-ին ահաբեկիչների կողմից իր ավտոմեքենայի գնդակոծության հետեւանքով: Այս մասին հայտարարել է Իրանի ԱԳՆ պաշտոնական ներկայացուցիչ Էսմայիլ Բաղային։

«Կիրակի՝ դեկտեմբերի 15 -ին, ահաբեկչական տարրերը գնդակոծել են Դամասկոսում Իրանի դեսպանատան աշխատակից Սեյեդ Դաուդ Բիթարաֆի ավտոմեքենան, նա զոհվել է», - ասված է Իրանի արտաքին քաղաքական գերատեսչության հայտարարության մեջ:

Դիվանագետն «ընդգծել է, որ այդ հանցագործության մեղավորներին գտնելու, դատական հետապնդման եւ պատժելու պատասխանատվությունը կրում է Սիրիայի անցումային կառավարությունը« եւ հավելել է, որ Իրանի արտաքին գործերի նախարարությունը լրջորեն զբաղվում է այդ հարցով:

Դեկտեմբերի 8-ին Դամասկոսում Իրանի դեսպանատունը հարձակման է ենթարկվել Սիրիայի մայրաքաղաքում իշխանությունը զավթած զինված խմբավորումների ներկայացուցիչների կողմից: Իսլամական Հանրապետության ԱԳՆ-ն դատապարտել է հարձակումը և կոչ արել թույլ չտալ ապագայում նման միջադեպերի կրկնություն: Դիվանագետները հասցրել են տարհանվել Լիբանան։ Իրանի արտաքին քաղաքական գերատեսչությունը հայտարարել է, որ կվերսկսի դեսպանատան աշխատանքը միայն այն ժամանակ, երբ նոր իշխանությունները ապահովեն դիվանագիտական առաքելության աշխատանքի անվտանգությունը:

Նոյեմբերի վերջին զինված ընդդիմադիր կազմավորումները լայնածավալ հարձակում են սկսել սիրիական բանակի դիրքերի վրա։ Դեկտեմբերի 8-ին նրանք մտան Դամասկոս, Բաշար Ասադը թողեց Սիրիայի նախագահի պաշտոնը և լքեց երկիրը։ Դեկտեմբերի 10-ին Մուհամեդ ալ-Բաշիրը, որը ղեկավարում էր Իդլիբ նահանգում, այսպես կոչված, փրկության կառավարությունը, հայտարարել Է Սիրիայի անցումային կառավարության ղեկավար նշանակվելու մասին, որը կտեւի մինչեւ 2025 թվականի մարտի 1-ը: