Իրանում փոխում են ազգային արժույթը

Իրանի նախագահ Մասուդ Փեզեշկիանը խորհրդարան է ներկայացրել նոր ազգային արժույթի՝ թումանի անցնելու մասին օրենքի նախագիծը, որը կփոխարինի արագորեն արժեզրկվող իրանական ռիալին։ Այս մասին գրում է ТАСС-ը։

Նշվում է, որ դրամավարկային բարեփոխումների անբաժանելի մասը պետք է լինի ազգային արժույթի դենոմինացիան 10000:1 հարաբերակցությամբ։

Օրենքի նախագիծը, որն այսօր ներկայացվել է պատգամավորների քննարկմանը, կառավարության կողմից հավանության է արժանացել դեռևս 2019 թվականի հուլիսին, երբ երկրի նախագահը Հասան Ռոհանին էր։

 Իրանի իշխանությունները կարծում են, որ դենոմինացիա  պետք է իրականացվի որքան հնարավոր է շուտ։ Պատճառը իրանական ռիալի շուկայական փոխարժեքի ռեկորդային անկումն է. դեկտեմբերի 19-ին այն իջել է ԱՄՆ դոլարի նկատմամբ պատմական նվազագույնի` 1 դոլարի դիմաց 777 հազար ռիալ։ Միաժամանակ, Իրանի Կենտրոնական բանկի պաշտոնական փոխարժեքը 2017 թվականից ի վեր գրեթե անփոփոխ է՝ 1 դոլարի դիմաց 420 հազար ռիալի մակարդակում։ Սա լուրջ խնդիրներ է ստեղծում արտահանողների համար, որոնք ստիպված են արտասահմանում վաստակած դոլարը փոխել ռիալի պաշտոնական փոխարժեքով։

 Իրանական արժույթի թուլացումը կապված է ինչպես աշխարհաքաղաքական լարվածության և Թեհրանի դեմ արևմտյան պատժամիջոցների բացասական ազդեցության, այնպես էլ երկրում շարունակվող էներգետիկ ճգնաժամի հետ, որը սրվել է ցուրտ սեզոնի ընթացքում: