ԼՈՒՍԱՆԿԱՐՆԵՐ․ Շղթայական ավտովթար․ բախվել են 26 մեքենաներ․ պարզաբանում
Ահազանգ չորս տարբեր վթարների մասին եղել է։ Այս մասին Auroranews-ի հետ զրույցում հայտնեցին ՆԳՆ ոստիկանությունից՝ պատասխանելով Արարատի մարզում 26 ավտոմեքենաների մասնակցությամբ շղթայական վթարի մասին հարցին։
«Արարատի մարզում Շահումյան գյուղի տարածքում ճանապարհատրանսպորտային պարատարներ են գրանցվել։ Մարմնական վնասվածքով անձ չենք ունեցել, տուժածներ չեն եղել։ Վթարներն արձանագրվել են»,- նշեցին մեզ հետ զրույցում։
Նշենք, որ ավելի վաղ Shamshyan.com-ը հայտնել էր, որ ճանապարհի մառախուղի և որոշ վարորդների ոչ ձմեռային անվադողերով ավտոմեքենա վարելու հետևանքով խոշոր ու շղթայական ավտովթար է տեղի ունեցել Արարատի մարզում: Ժամը 08:30-ի սահմաններում Երևան-Երասխ ավտոճանապարհի Շահումյան գյուղի վարչական տարածքում մոտ 1,5 կմ հատվածում բախվել են 26 տարբեր մակնիշի ավտոմեքենաներ:
Կայքը հայտնում էր, որ, ըստ նախնական տեղեկությունների, վթարի հետևանքով կան տուժածներ, որոնց կյանքին բարեբախտաբար վտանգ չի սպառնում:
Նշվում է, որ վթարն առաջացրել է խցանում:
