«Դոմուսի» հրդեհի հետևանքով կան տուժածներ

«Դոմուս» հիպերմարկետի պահեստի հատվածում տեղի ունեցած հրդեհի հետևանքով 1 հոգի շտապօգնության մեքենայով տեղափոխվել է Շենգավիթ ԲԿ։

Այս մասին հայտնեց «Շտապօգնություն» ՓԲԸ-ի տնօերն Ռուբեն Գրիգորյանը։

«1 հոգի էլ տեղում է սպասարկվել, ունեցել է ինքնազգացողության վատացում։ Պացիենտը, որը տեղափոխվել է ԲԿ, ըստ նախնական տեղեկության՝ հաճախասրտություն է ունեցել»․- մանրամասնեց Գրիգորյանը։

Հիշեցնենք, որ ըստ ՆԳՆ տարածած հաղորդագրության՝ հոկտեմբերի 7-ին, ժամը 12:57-ին Ճգնաժամային կառավարման ազգային կենտրոն ահազանգ է ստացվել, որ հրդեհ է բռնկվել Երևան քաղաքի Իսակովի պողոտայում գտնվող «Դոմուս» հիպերմարկետի պահեստային տարածքում: Հրդեհի բարդության «1 ԲԻՍ» կանչով դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից չորս մարտական հաշվարկ և մեկ ավտոսանդուղք։ Հայտարարվել է հրդեհի բարդության «Թիվ 2» կանչ․ դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից ևս երկու մարտական հաշվարկ, մեկ ավտոսանդուղք, Ճգնաժամային կառավարման ազգային կենտրոնի օպերատիվ, Բժշկական ապահովման վարչության, Հրդեհաշիջման և փրկարարական աշխատանքների կազմակերպման բաժնի հերթապահ և Փրկարարական ուժերի վարչության Հրդեհաշիջման և փրկարարական աշխատանքների կազմակերպման բաժնի հերթապահ խմբերը և Հոգեբանական աջակցության բաժնի հերթապահ հոգեբանը։ Հրդեհի բարդությունից ելնելով հայտարարվել է հրդեհի բարդության «Թիվ 3» կանչ․ դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից ևս չորս մարտական հաշվարկ։