«Փոսի» դպրոցի աշակերտները երկուշաբթի ևս դասի չեն գնա
Երևանի Հակոբ Օշականի անվան, հանրությանն առավել հայտնի «փոսի» դպրոցում դասապրոցեսը կշարունակվի անցկացվել հեռավար եղանակով: Այս շաբաթվա սկզբին շենքում զգացվել էին ցնցումներ, որից հետո դպրոցի տնօրեն Գայանե Մկրտչյանը ահազանգել էր Փրկարար ծառայություն և Երևանի քաղաքապետարան, որոշում կայացնելով տարհանել աշակերտներին:
Սեպտեմբերի 11-ին «Auroranews»-ն այցելել էր Հակոբ Օշականի անվան դպրոց իրավիճակին տեղում ծանոթանալու նպատակով: Մեր այցելության պահին Երևանի քաղաքապետարանի երկրաբանական մասնագիտական խումբն էր աշխատում տեղում՝ խնդիրները պարզելու համար: Գայանե Մկրտչյանը «Auroranews»-ի հետ զրույցում հույս էր հայտնել, որ շաբաթվա վերջում երկրաբանական խմբի եզրակացությունը պատրաստ կլինի և երկուշաբթի երեխաները կվերադանան դպրոց:
Երևանի Քաղաքապետի մամուլի խոսնակ Հայկ Կոստանյանը «Auroranews»-ին հայտնեց, որ երկրաբանական եզրակացությունը դեռևս պատրաստ չէ և երկուշաբթի ևս դասապրոցեսը կանցկացվի հեռավար:
