ԱՄՆ նախագահ Ջո Բայդենը պետք է ապացուցի, որ Մերձավոր Արևելքում վերջերս իր հնչեցրած փուլային կարգավորման ծրագիրը նախընտրական ներդրում չէ, այլ արտացոլում է խնդիրը լուծելու անկեղծ ցանկությունը: Այս մասին հայտարարել է Թուրքիայի առաջնորդ Ռեջեփ Թայիփ Էրդողանը Իսպանիա և Իտալիա ուղևորությունների ավարտից հետո լրագրողների հետ զրույցում:

«Բնականաբար, ակնկալիքներ կան, որ պարոն Բայդենը կապացուցի, որ այս ծրագիրը ոչ թե պարզապես նախընտրական ներդրում է, այլ իրական և անկեղծ քայլ, որը ձեռնարկվել է Պաղեստինի կոտորածը դադարեցնելու համար։ ՄԱԿ -ի Անվտանգության խորհրդի բանաձևը մեկ քայլ է, բայց դա բավարար չէ։ Մենք գիտենք, թե թղթի վրա խորհրդի քանի որոշում է անտեսվում Իսրայելի կողմից։ Բայդենն այժմ անկեղծության ստուգում է անցնում», - Էրդողանի խոսքը մեջբերում է Anadolu գործակալությունը։

Թուրքիայի նախագահը նաև նշել է, որ «ԱՄՆ-ն մտահոգված է Իսրայելի աճող ամբարտավանությամբ», թեև «ամերիկյան վարչակազմն ինքը բացահայտ դժգոհություն չի հայտնել»:

«Ամերիկյան համալսարաններում, փողոցներում, ուսանողների եւ ռեկտորների շրջանում հասարակության ձայները ցույց են տալիս, որ որոշակի տրանսֆորմացիա է սկսվել։ Եվ դա լրջորեն անհանգստացնում է Իսրայելին», - հավելել է նա։

Էրդողանը նշել է, որ գոհ է կարգավորման նախաձեռնությունից, սակայն «դա բավարար չէ ՄԱԿ-ի Անվտանգության խորհրդի հինգ մշտական անդամներին Պաղեստինի կողմը գրավելու համար»:

«Բայց հիմա արդեն բոլորը համոզված են, որ իրավիճակն այլևս հին ձևով չի զարգանա։ Հուսով եմ, որ ԱՄՆ-ում կայանալիք ընտրությունների համատեքստում (Պաղեստինի շուրջ) մթնոլորտը կփոխվի։ Հուսով եմ, որ միասին մենք ճիշտ քայլեր կանենք, և ՄԱԿ - ի ԱԽ-ի ապագա որոշումները իրավիճակը բոլորովին այլ ուղղությամբ կտանեն», - հավելել է նա։

Մայիսի 31-ին ԱՄՆ նախագահ Ջո Բայդենը հայտարարել է Գազայի հատվածում կարգավորման մասին համաձայնագրի նոր նախագծի պայմանները, որը բաղկացած է երեք փուլից: Առաջինը նախատեսված է վեց շաբաթվա համար և ենթադրում է լիակատար հրադադար, իսրայելական զորքերի դուրսբերում բնակեցված շրջաններից, ՀԱՄԱՍ շարժման կողմից պահվող պատանդների ազատագրում՝ իսրայելական բանտերից հարյուրավոր պաղեստինցի բանտարկյալների ազատ արձակման դիմաց։ Բացի այդ, այս ժամանակահատվածում կողմերը պետք է սկսեն բանակցությունները, իսկ հրադադարի ռեժիմը կգործի մինչև փոխըմբռնման հասնելը։ Երկրորդ փուլը ենթադրում է բոլոր պատանդների, այդ թվում՝ զինծառայողների ազատ արձակում։ Երրորդ փուլը Գազայի հատվածի վերականգնումն է եւ զոհված իսրայելցիների մասունքների փոխանցումը հարազատներին։