Խաղաղության պայմանագրի ստորագրման հարցն անընդհատ կա. Հարությունյանը՝ ադրբեջանական կողմի հետ քննարկումների մասին

Դրանք վերաբերում են շատ տարբեր հարցերի, օրինակ՝ սահմանազատման, սահմանագծման օրակարգով պարոն Գրիգորյանն է աշխատում, ԱԳՆ-ն համապատասխանաբար իրենց օրակարգով է աշխատում: Այս մասին լրագրողների հետ զրույցում ասել է վարչապետի աշխատակազմի ղեկավար Արայիկ Հարությունյանը՝ անդրադառնալով ադրբեջանական կողմի հետ քննարկումներին:

«ԱԽ-ն և Արմեն Գրիգորյանն իր գործընկերոջ հետ են աշխատում: Երբ արդյունքները լինում են, մենք դրանց մասին խոսում ենք, և կարծում եմ, որ այն տեմպը, որ կա Հայաստան-Ադրբեջան գործընթացում, հարաբերություններում, վատը չէ, օրինակ՝ Ադրբեջանի կողմից իր մասով հայկական բեռների տեղափոխման շրջափակման արգելքի հանումը: Պետությունների ղեկավարների միջև շփում երբ լինում է, դուք այդ մասին իմանում եք պարտադիր»,- նշել է նա:

Հարությունյանը հավելել է, որ ինտենսիվ շփումները բոլոր հարցերի շուրջ են: 

«Երկկողմ շփումներում խաղաղության պայմանագրի ստորագրման հարցն անընդհատ կա, և պետք է փորձենք նաև ընդհանուր եզրեր գտնել, որ այդ փաստաթուղթը ստորագրվի»,- հավելել է վարչապետի աշխատակազմի ղեկավար Արայիկ Հարությունյանը: