«Հետքն էլ չկա՝ շոր կամ կոշիկի թայ». 3-ամյա Տիգրանին վերջին անգամ տեսել են եղբոր հետ
Գեղարքունիքի մարզի Ծափաթաղ գյուղում արդեն երկու օր է շարունակվում է 3 տարեկան Տիգրան Օվանեսովի որոնողական աշխատանքը։ Ըստ ոստիկանության՝ փոքրիկը հոկտեմբերի 27-ին, ժամը 16։30-ի սահմաններում, դուրս է եկել տնից 5-ամյա եղբոր հետ, սակայն որոշ ժամանակ անց եղբայրը միայնակ է վերադարձել։ Տղան խոսքի խանգարում ունի և չի կարողանում պատմել տեղի ունեցածի մասին, գրում է Sputnik Արմենիան։
Գյուղի բնակիչ Վահան Համբարձումյանը պատմել է, որ Տիգրանի անհետացման լուրը լսելուն պես միացել է որոնումներին․ «Մինչև հիմա փնտրում ենք, ոչ մի հետք չկա՝ ո՛չ հագուստ, ո՛չ կոշիկ։ Վերջին անգամ երեխաներին իրենց բակում եմ տեսել, հետո ասել են՝ եղբայրը գնացքի գծերից մենակ է վերադարձել»,– նշել է նա։
Գյուղի բուժքույր Ալմաստ Վարդանյանի խոսքով՝ ընտանիքը հանգիստ ու աշխատասեր է, ապրում է հողագործությամբ և անասնապահությամբ։ Նրա խոսքով՝ Տիգրանը միշտ մաքուր ու կոկիկ է եկել մանկապարտեզ, և ընտանիքը շատ հոգատար է երեխաների նկատմամբ։
«Մայրը երեխային շատ է սիրում, և տարածվող մեղադրանքները պարզապես անհեթեթ են»,– ասել է բուժքույրը։
Նշենք, որ Օվանեսովների ընտանիքում, ըստ հարևանների, երեխաներն ունեն տարբեր առողջական խնդիրներ։ Ոստիկանությունը շարունակում է որոնողական աշխատանքները՝ ներգրավելով նաև ջրափրկարարական ստորաբաժանումներ։
Որոնողափրկարարական աշխատանքներին ներգրավված է շուրջ 500 մարդ, այդ թվում՝ փրկարար ծառայության աշխատակիցներ, կամավորներ և գյուղացիներ։ Գործողությունները իրականացվում են գյուղի ողջ տարածքում և հարակից գոտիներում՝ մինչև լիճ, որը գտնվում է մոտ մեկ կիլոմետր հեռավորության վրա։
