Վլադիմիր Սոլովյովի, Մարգարիտա Սիմոնյանի դեմ հայց է ներկայացվել Հաագայի դատարան

Իրավապաշտպանները հայց են ներկայացրել Հաագայի դատարան ռուսաստանցի վեց քարոզիչների դեմ։ Այս մասին հայտնում է BBC-ի ռուսական ծառայությունը։

Մարդու իրավունքների միջազգային ֆեդերացիան (FIDH) մեղադրում է հեռուստահաղորդավարներ Վլադիմիր Սոլովյովին և Դմիտրի Կիսելևին, «Կոմսոմոլսկայա պրավդա»-ի հեղինակ Սերգեյ Մարդանին, RT-ի գլխավոր խմբագիր Մարգարիտա Սիմոնյանին և Անվտանգության խորհրդի փոխնախագահ և բլոգեր Դմիտրի Մեդվեդևին ատելության խոսքօգտագործելու մեջ։ 

Բացի այդ, FIDH-ը խնդրում է ստուգել ՌԴ նախագահի աշխատակազմի ղեկավարի առաջին տեղակալ Ալեքսեյ Գրոմովին, ով պատասխանատու է ռուսական լրատվամիջոցներում քարոզչության համար։

Ինչպես գրում է BBC-ի ռուսական ծառայությունը, ատելության խոսքը դեռևս հանցագործություն չի համարվում Հռոմի ստատուտի համաձայն, որով էլ առաջնորդվում է ՄՔԴ-ն, սակայն իրավապաշտպանները ցանկանում են նախադեպ ստեղծել, որ ատելության խոսքը հնարավոր լինի ճանաչել որպես մարդկության դեմ հանցագործություն։