Սրբազանը՝ հանրահավաքներին փողով մասնակցելու Հովիկ Աղազարյանի հայտարարության մասին

Դատախազությանը, ԱԱԾ-ին հորդորում եմ գնալ այդ հայտարարությունների հետևից և նախաձեռնել իրավական գործընթաց: Այս մասին այսօր՝ մայիսի 13-ին, լրագրողների հետ զրույցում նշել է «Տավուշը հանուն հայրենիքի» շարժման ղեկավար, Տավուշի թեմի առաջնորդ Բագրատ Սրբազանը` անդրադառնալով հայտարարություններին, թե իր նախաձեռնած հավաքներին մասնակցում են հիմնականում փող վերցնելով:

«Դրանք հանցանքներ են: Եթե դատախազությունը, ԱԱԾ-ն ունեն փաստեր, թող գործ հարուցեն: Պետք է այդ հայտարարությունների հետևից գնան: Եթե չեն գնում, ուրեմն այդ կառույցները չեն գործում»,- հայտարարել է Բագրատ արքեպիսկոպոս Գալստանյանը:

Հիշեցնենք, որ ավելի վաղ ՔՊ խմբակցության պատգամավոր Հովիկ Աղազարյանն էր հայտարարել, թե հանրահավաքի մասնակիցների 70 տոկոսը փողով է մասնակցում: