Իսրայելը զորքերը դուրս է բերել Գազայի հատվածի հարավից՝ այնտեղ թողնելով միայն մեկ բրիգադ
Իսրայելի պաշտպանության բանակը Գազայի հատվածի հարավից դուրս է բերել 98-րդ դիվիզիան, որը վերջին չորս ամիսների ընթացքում գործողություններ էր իրականացնում Խան Յունիսում։ Ըստ The Times of Israel-ի՝ Գազայի հատվածում այժմ մնացել է միայն «Նահալ» հետևակային բրիգադը, որը կապահովի, այսպես կոչված, «Նետզարիմի միջանցքի» անվտանգությունը։
Խոսքը միջանցքի մասին է, որն անցնում է Գազայի հատվածը հարավային Իսրայելի Բեերի շրջանից դեպի ափ և խոչընդոտում է պաղեստինցի փախստականների վերադարձը հարավից հյուսիսային շրջաններ:
Ինչպես նշում է Reuters-ը, պարզ չէ, թե արդյոք Գազայի հատվածի հարավում գտնվող Ռաֆահ քաղաքի վրա իսրայելական հայտարարված հարձակումը այժմ կհետաձգվի, թե ոչ։ Իսրայելի վարչապետ Բենիամին Նեթանյահուն ասել է, որ դա անհրաժեշտ է ՀԱՄԱՍ-ի վերջնական ոչնչացման համար, սակայն արևմտյան իշխանությունները մտավախություն են հայտնել քաղաքացիական բնակչության «անընդունելի» զոհերի մասին, որոնց կարող է հանգեցնել այս ծրագրի իրականացումը։
ՄԱԿ-ը հայտարարել է, որ Իսրայելի ռազմական գործողությունը Ռաֆահում աղետ կլինի Գազայի հատվածի բնակիչների համար։ Միացյալ Նահանգները նաև զգուշացրել է, որ չի աջակցի Ռաֆահում գործողությանը առանց պաղեստինցի խաղաղ բնակիչների անվտանգության երաշխիքների։
Ըստ The Jerusalem Post-ի՝ Իսրայելի պաշտպանության բանակը հայտարարել է պատերազմի ակտիվ փուլի ավարտի մասին՝ բաց թողնելով Ռաֆահ ապագա ներխուժման հնարավորությունը։ Չնայած իսրայելական բանակը պնդում է, որ դուրսբերումը կապված չէ ԱՄՆ ճնշման հետ, որոշումը կայացվել է Գազայի հատվածի վրա վերջերս տեղի ունեցած հարձակումից հետո, որի հետևանքով զոհվել են World Central Kitchen մարդասիրական կազմակերպության յոթ աշխատակիցներ։
Սպիտակ տան խոսնակ Ջոն Քիրբին ABC-ին տված հարցազրույցում ենթադրել է, որ Իսրայելի պաշտպանության բանակի 98-րդ դիվիզիայի դուրսբերումը կարող է կապված լինել զորքերի վերախմբավորման հետ։
Միևնույն ժամանակ, Իսրայելում շարունակվում են բողոքի ցույցերը՝ Նեթանյահուի հրաժարականի պահանջով։ Դրանց կազմակերպիչները երկրի իշխանություններին մեղադրում են այն բանում, որ նրանք չեն ցանկանում անհրաժեշտ միջոցներ ձեռնարկել պատանդներին ազատելու համար, որոնց ՀԱՄԱՍ-ի զինյալները գերեվարել էին ուղիղ վեց ամիս առաջ։
