ՏԵՍԱՆՅՈՒԹ․ Բազմաթիվ ահազանգեր՝ Նոր Հաճնի կամրջի անբարեկարգ լինելու մասին․ ՏԿԵՆ պարզաբանումը

Auroranews-ը բազամթիվ ահազանգեր է ստանում Նոր Հաճնի կամրջի անբարեկարգ վիճակի մասին: Նշվում է, որ իրավիճակն ավելի վատթար է դառնում անձրեւային եղանակին, երբ փոսերը լցվում են ջրով, իսկ գիշերը՝ ոչ կամուրջն է երեւում, ոչ էլ փոսերը:

Պարզաբանում ստանալու համար Auroranews-ը դիմեց Տարածքային կառավարման եւ ենթակառուցվածքների նախարարություն:

Գերատեսչությունից հայտնում են, որ նախորդ տարի կամուրջը նորոգելու համար երկու մրցույթ է հայտարարվել՝ հոկտեմբերին ու նոյեմբերին: Երկու մրցույթներն էլ չեն կայացել՝ մասնակիցներ չլինելու պատճառով:

«Առաջիկայում կրկին պատրաստվում ենք մրցույթ հայտարարել: Շինարարական ընկերություն պիտի լինի, որը կիրականացնի այդ աշխատանքները»,-  ասացին նախարարությունից։

Գերատեսչությունից հույս հայտնեցին, որ այդուամենայնիվ երրորդ անգամ հայտարարված մրցույթին մասնակից կլինի: