Առուշ Առուշանյանը` ոչ սթափ վիճակում մեքենա վարելու մասին

Գորիսի քաղաքապետ Առուշ Առուշանյանը հերքում է տեղեկությունը, թե ինքը ալկոհոլի ազդեցության տակ այսօր վարել է հոր կողմից գնած գոլդ համարանիշներով մեքենան:

«Էս դժվար իրավիճակում փոխանակ փորձենք մի բան շտկել, մի բան առաջ տանել, միայն խոսում ենք զրոներից» ,-Aravot.am-ին ասել է Առուշ Առուշանյանը, ապա շարունակել է. «Ողջ կյանքս զբաղվել եմ սպորտով, հիմա էլ զբաղվում եմ սպորտով, որպես կանոն խմիչքից շատ-շատ հեռու եմ, որպես կանոն խմիչքի փոխարեն միշտ նախընտրում եմ սպորտը, սա մի ռաունդ: Ինչ գրված է դրանով զբաղվում են փաստաբանները, օրենքի դաշտում, երբ լինի վերջնական պատասխան, կտեղեկանաք այդ մասին»:

Առուշանյանից հետաքրքրվել են՝ այսինքն վիճարկում է մեքենա վարելու իրավունքից իրեն զրկելու որոշու՞մը , թե՞ դրա մասին տեղեկությունը, որը զրպարտություն է համարում, ի պատասխան ասել է. «Ինչպես ասացի փաստաբաններն են զբաղվում այդ հարցով: Ո՛չ ասում եմ զրպարտություն է, ո՛չ էլ ձեր մյուս թվարկածը, ես նման բան չեմ ասում, փաստաբանները օրենքի շրջանակում կլուծեն խնդիրը, ես դրանով չեմ զբաղվում»:

Հիշեցնենք, որ ըստ shamshyan.com-ի պարեկները Առուշանյանին բռնել են խմածության ամենաբարձր աստիճանով, մեքենան տեղափոխել ՊԾ Երևան քաղաքի գնդի պահպանվող հատուկ տարածք, իսկ Առուշանյանին մեկ տարով զրկել մեքենա վարելու իրավունքից: