Պեսկովը` Ռուսաստան-Ուկրաինա բանակցությունների մասին
Ուկրաինան կարող էր 2022 թվականի մարտին Ռուսաստանի հետ խաղաղության համաձայնագրեր կնքել ավելի ցածր գնով, բայց անգլո-սաքսոնների խնդրանքով այն հետո հրաժարվեց ձեռք բերված արդյունքներից, այժմ իրավիճակից ելքը գնալով ավելի դժվար է լինելու Կիևի և Արևմուտքի համար։ Այս մասին ասել է ՌԴ նախագահի մամուլի քարտուղար Դմիտրի Պեսկովը։
«Հավաքական Արևմուտքի և Ուկրաինայի համար ամեն անգամ ավելի ու ավելի դժվար կլինի»,- ասել է Պեսկովը՝ պատասխանելով այն հարցին, թե ինչպես է Արևմուտքը կարող արժանի ելք գտնել այն իրավիճակից, որի մասին խոսել է ՌԴ նախագահ Վլադիմիր Պուտինը ամերիկացի լրագրող Թակեր Կարլսոնին տված հարցազրույցում։
«Որովհետև Ուկրաինան կարող էր խաղաղության համաձայնագրեր կնքել մարտին (2022թ. - խմբ.) ավելի ցածր գնով, բայց դա չարեց, ավելի ճիշտ՝ արեց դա, իսկ հետո, ինչպես մենք ենք ասում, անգլո-սաքսոնների խնդրանքով նրանք հրաժարվեցին բանակցությունների հնարավորությունից»,- ընդգծել է նա։
Պեսկովը, խոսելով Ուկրաինայի հետ նոր խաղաղ բանակցությունների հնարավորության մասին, ասել է, որ այժմ իրականությունը բոլորովին այլ է, և Կիևի ռեժիմը պետք է ճանաչի դա։
«Հիմա, եթե մենք գնանք նույն բանակցություններին, ապա հիմա կա բոլորովին այլ իրականություն: Եվ այս այլ իրականությունը, որքան էլ ցավալի լինի Կիևի ռեժիմի համար, պետք է ճանաչվի», - ասել է Պեսկովը:
