Իտալիայում շարունակվում են ֆերմերների բողոքի ցույցերը: Նրանք իշխանություններից պահանջում են ապահովել հայրենական արտադրանքի պաշտպանությունը և չեղարկել Եվրամիության ոչ ԵՄ անդամ երկրների հետ կնքված երկկողմ համաձայնագրերը, առաջին հերթին՝ Ուկրաինայի հետ, որոնք «ոչնչացնում են» անդամ երկրների գյուղատնտեսությունը։

Բողոքի ակցիայի մասնակիցները, շարժվելով տրակտորներով, անցած գիշերն անցկացրել են բաց երկնքի տակ և հրաժարվել են հեռանալ, չնայած այն բանին, որ իրենց թույլ չեն տվել մտնել Հռոմ։

Հռոմի պրեֆեկտ Լամբերտո Ջիանինին թույլ չի տվել սարքավորումների մուտքը մայրաքաղաք։ Իշխանությունները մտավախություն ունեն, որ եթե թույլ տան տրակտորների մուտքը Հռոմ, իտալական այլ քաղաքներում նույնպես կարող են ցույցեր սկսվել: