ՏԵՍԱՆՅՈՒԹ. Ընենց կպատասխանեի՝ աշխարհացունց բան կլիներ. Աղազարյանը՝ կոռուպցիոն սկանդալի մասին
Կոռուպցիայի դեմ պայքարը յուրային-ոչ յուրային չի նայում: Այս մասին NEWS.am-ի հետ զրույցում նշել է ԱԺ ՔՊ խմբակցության պատգամավոր Հովիկ Աղազարյանը՝ անդրադառնալով Էկոնոմիկայի նախարարությունում սկսված ձերբակալություններին, որի շրջանակներում այսօր կալանավորվել է նաեւ ԱԺ նախագահ Ալեն Սիմոնյանի եղբոր կինը՝ Անի Գեւորգյանը:
«Այդ պայքարն իր էության մեջ այնպիսին է, որ այդ բացասական երեւույթները արմատախիլ արվեն, շատ հաճախ կանխարգելիչ միջոցառումներ պետք է իրականացվեն: Քննությունը կգնա, կպարզվի՝ ինչն ինչոց է: Պետք չի ասել, որ յուրայինների նկատմամբ են այդպիսի քայլեր իրականացվում, որովհետեւ ճիշտ իրավապահ մարմինները այդ նարատիվներով չեն առաջնորդվում, իրենք կատարում են իրենց գործը»,-ասել է նա:
Դիտարկմանը, որ նոր չէ իշխանությունն իմացել, թե իր թիմակիցներից ամեն մեկն ինչով է զբաղվում, ինչո՞ւ են հիմա իրականացվում այս բացահայտումները, Աղազարյանը պատասխանել է. «Եթե իրավիճակն այսքան դժվար չլիներ, մի հատ նենց հետաքրքիր ձեւով կպատասխանեի այդ հարցին, որ աշխարհացունց բան կլիներ: Ի՞նչ է նշանակում՝ ինչու: Ամեն հարց հասունանում է եւ գալիս է իր լուծմանը: Լրագրողներն անընդհատ հարցնում են՝ ինչո՞ւ հիմա Աշոտյանին կալանավորեցին, ինչո՞ւ հենց հիմա սա տեղի ունեցավ: Որովհետեւ դա գործընթաց է, որ գնում եւ հասնում է իր տրամաբանական ավարատին: Հեշտ չի մարդուն ձերբակալել, կալանավորել առանց լուրջ հիմքեր ունենալու: Հո իրավապահները չե՞ն հայտարարելու, ասեն՝ սիրելի այսինչյան այսինչ, մենք պատրաստվում ենք ձեր նկատմամբ այսպիսի սանկցիա կիրառել, եթե դուք հնարավորություն ունեք, խուսանավեք»:
Ինչ վերաբերում է ամիսներ առաջ Նիկոլ Փաշինյանի արած հայտարարությանը, թե Ալեն Սիմոնյանի եղբայրը հո անգործ չպե՞տք է մնա, ՔՊ-ական պատգամավորն ասել է. «Այո, Ալեն ՍԻմոնյանի եղբայրը, Հովիկ Աղազարյանի տղաները, այլ պաշտոնյաների հարազատները իրապես հո անգործ չե՞ն մնա: Մյուս կողմից, այնտեղ, որտեղ կա Ալեն Սիմոնյանի եղբայրը, Հովիկ Աղազարյանի որդին, տենդեր լինի, ինչ ուզում է լինի, անկասկած կա կոռուպցիոն ռիսկ: Հիմա իրավապահներին եւ լրագրողների պարտավորությունն է հետեւել եւ պարզել՝ այդ կոռուպցիոն ռիսկը վե՞ր է ածվում կոռուպցիայի, թե ոչ: Սա է իմ պատասխանը»:
