Պատերազմից վերադարձած «Шторм Z» ստորաբաժանումներից նախկին բանտարկյալները դիմել են ՌԴ նախագահ Վլադիմիր Պուտինին՝ հայտնելով, որ չեն ստանում խոստացված աշխատավարձերը և վնասվածքների համար վճարումները։ Նրանք նաև պնդում են, որ չեն ստանում իրենց դատվածությունը հանելու մասին փաստաթղթեր: Այս մասին գրում է Meduza–ն՝ վկայակոչելով նամակ, որը ավելի վաղ հրապարակել է «Важные истории»–ն:

Բողոքի իսկությունը հրատարակությանը հաստատել է դրա հեղինակներից մեկը։

Պուտինին ուղղված կոչ են գրել Ուկրաինայի պատերազմին մասնակցած յոթ նախկին բանտարկյալները։ Նրանք գրում են, որ պատերազմին մասնակցելու ընթացքում «չեն ստացել ոչ մի ամբողջական աշխատավարձ, չեն ստացել մարտական ​​վճարներ առաջնագծում գտնվելու համար, չեն ստացել երաշխավորված վճարներ ստացած վիրավորումների դիմաց»։ Նամակի հեղինակները նշում են, որ իրենք չեն կարող ձևակերպել մարտական ​​վետերանների վկայականներ, քանի որ զորամասը չի տրամադրում անհրաժեշտ քաղվածքները։

42-ամյա Ռոման Պոլյակովը, ով 2023 թվականի ամռանը կռվել է Սևերոդոնեցկի և Զապորոժիեի ուղղություններում, լրագրողներին ասել է, որ ստացել է բազմաթիվ վնասվածքներ։ Նրա խոսքով՝ այժմ նա չի կարողանում աշխատանք գտնել Ռուսաստանում՝ քրեական անցյալի պատճառով։ Նա պնդում է, որ գաղութում հավաքագրվելու ժամանակ բանտարկյալներին խոստացել են «ամբողջական սոցիալական փաթեթ» և հավասար պայմաններ այլ մարտիկների հետ պատերազմին մասնակցելու համար։ Սակայն նրանց չեն տրվել պայմանագրերի պատճենները: Բացի դա, պարզվել է, որ նշված փաստաթղթերը ոչ թե ՊՆ-ի փաստաթղթեր են, այլ կամավորական կազմավորումներին մասնակցելու պայմանագրեր, որոնք ստորագրել է ինքնահռչակ ԴԺՀ–ի ղեկավարը։

Նրա խոսքով, իրեն և մյուս բանտարկյալներին խոստացել են «ամբողջական վերականգնում», այսինքն՝ դատվածության հանում:

«Իրականում մեզ վճարել են մեր աշխատավարձի առավելագույն կեսը՝ 100–105 հազար։ Ինձ վճարեցին երեք օրվա մարտական ​​վարձատրություն, թեև ուղիղ երեք ամիս անցկացրի կարմիր գոտում։ Վնասվածքների համար մեզ ասացին, որ մեր վճարումը եղել է ոչ թե նախագահի 98-րդ հրամանագրով, այլ մեզ համար ՊՆ-ից առանձին հրաման կա՝ թեթեւ վնասվածքի համար՝ 50 հազար ռուբլի, ծանր վնասվածքի համար՝ 300 հազար։ Բայց այս գումարն էլ անհնար է տեսնել, քանի որ, օրինակ, արդեն երկու ամիս է, ինչ վնասվածքի լրջության մասին տեղեկանք չեմ կարողանում ստանալ»,- ասել է Պոլյակովը։