Գազան մահվան և հուսահատության վայր է. ՄԱԿ-ի պաշտոնյա
Գազայի հատվածը դարձել է մահվան և հուսահատության վայր, որտեղ առողջական աղետ է սպասվում։ Այս մասին ասվում է ՄԱԿ-ի գլխավոր քարտուղարի մարդասիրական հարցերով տեղակալ Մարտին Գրիֆիթսի հայտարարության մեջ:
«Հոկտեմբերի 7-ի սարսափելի հարձակումից երեք ամիս անց Գազան վերածվել է մահվան և հուսահատության վայրի»,- ասել է Գրիֆիթսը։
Իր խոսքով` տասնյակ հազարավոր մարդիկ, հիմնականում կանայք և երեխաներ, սպանվել կամ վիրավորվել են, ընտանիքները քնում են բաց տարածքում, իսկ ջերմաստիճանը կտրուկ անկում է ապրում:
Ինչպես նշել է գլխավոր քարտուղարի տեղակալը, ռմբակոծվել են այն տարածքները, ուր խաղաղ բնակիչներին հրամայվել է տեղաշարժվել իրենց անվտանգության համար։
«Բժշկական հաստատությունները գտնվում են մշտական հարձակման տակ: Այն մի քանի հիվանդանոցները, որոնք մասամբ գործում են, գերծանրաբեռնված են և խիստ ունեն բոլոր անհրաժեշտ պարագաների կարիքը», - ասել է Գրիֆիթսը:
