Սանոսյանը` արևային կայանների հզորությունը 1500 մեգավատի հասցնելու նպատակի մասին

Հայաստանի կառավարության համար ոգևորիչ են հաջողությունները, որոնք վերջին տարիներին արձանագրվել են արևային էներգետիկայի ոլորտում։ Այս մասին ասել է Հայաստանի տարածքային կառավարման և ենթակառուցվածքների նախարար Գնել Սանոսյանը:

«Բոլոր ցուցանիշները, որ դրել ենք, հաճախ ոչ միայն դրանց հասնում ենք, այլև գերազանցում ենք: Մենք բավականին խրախուսող քաղաքականություն ենք վարում արևային էներգիայի սարքավորումների տեղադրման առումով, և դա իր արդյունքը տալիս է: Մեր ռազմավարությամբ նպատակ ունենք արևային կայանների հզորությունը հասցնել 1500 մեգավատի»,-հայտնել է Գնել Սանոսյանը:

Վերջինս նաև կարևորել է ատոմակայանի շահագործման կրկնակի երկարաձգման գործընթացը: Նախարարը նշել է՝ նպատակ ունեն ատոմակայանի շահագործման լիցենզիան երկարաձգել ևս 10 տարով՝ 2026 թվականից հասցնելով մինչև 2036 թվական: Նա հիշեցրել է, որ այդ ընթացքում՝ շահագործմանը զուգընթաց, պլանավորում են ունենալ նոր ատոմային էներգաբլոկ:

«Մեզ համար շարունակում է մեծ հետաքրքրություն ներկայացնել անդրսևծովյան մալուխի ծրագիրը, և մենք աշխատանք ենք տանում գործընկեր երկրների հետ, որպեսզի Հայաստանը այդ ծրագրի մասնակից դառնա»,- եզրափակել է նա: